شہزادہ ہیری نے فیس بک کا خفیہ اکاؤنٹ بنایا تھا

02 جون ، 2020

شہزادہ ہیری نے اسپائک نام سے فیس بک کا خفیہ اکاؤنٹ بنایا تھا

لندن(مانیٹرنگ ڈیسک) شاہی خاندان کی خصوصی حیثیت چھوڑنے والے شہزادہ ہیری سے متعلق ایک دلچسپ انکشاف سامنے آیا ہے۔بین الاقوامی ویب سائٹ کی رپورٹ کے مطابق پرنس ہیری نے سماجی رابطے کی ویب سائٹ فیس بک پر اپنا خفیہ اکاؤنٹ ’اسپائک‘ کے نام سے بنایا ہوا تھا، جسے وہ عام صارفین کی طرح استعمال کرتے تھے۔

پرنس ہیری نے خفیہ اکاؤنٹ رکھ کر شاہی خاندان کے سوشل میڈیا قواعد و ضوابط کو بھی توڑا۔گزشتہ دنوں چیلسے ڈیوی سے ملاقات کے دوران پرنس ہیری نے خود ہی انکشاف کیا کہ انہوں نے اپنی خواہشات کو پورا کرنے کے لیے فیس بک پر ایک خفیہ اکاؤنٹ بنایا ہوا تھا۔

انہوں نے بتایا کہ وہ اکاؤنٹ ’اسپائک ویلز‘ کے نام سے تھا، جس کے بارے میں کسی کو بھی علم نہیں تھا۔رپورٹ کے مطابق شہزادہ ہیری کے اُس اکاؤنٹ پر چار سو سے زیادہ دوست تھے جس میں برطانیہ کی معروف شخصیات بھی شامل تھیں۔ بعد ازاں ہیری نے اُس اکاؤنٹ کو ڈیلیٹ کردیا۔

رپورٹ کے مطابق پرنس ہیری نے اس اکاؤنٹ کو 2008 سے 2012 تک چلایا اور اپنی بطور عام صارف اپنی رائے کا اظہار بھی کیا۔خیال رہے کہ ہیری اور ان کی اہلیہ میگھن مارکل پانچ ماہ قبل شاہی زندگی کو خیرباد کہہ کر شمالی امریکا منتقل ہوئے، یہ جوڑا شاہی خاندان سے الگ رہنے اور مالی طور پر مستحکم ہونے کا خواہش مند ہے۔

تازہ ترین