ارطغرل کی ایک اور اداکارہ پاکستان آنے کیلئے بے تاب

15 جون ، 2020

اسلامی فتوحات پر مبنی شہرہ آفاق تُرک سیریز ’دیرلیش ارطغرل‘ میں گوکچہ خاتون کا کردار نبھانے والی ترک اداکارہ بورجو کیراتلی نے بھی جلد پاکستان آنے کی خواہش ظاہر کردی ہے۔

حال ہی میں بورجو کیراتلی نے فوٹو اور ویڈیو شیئرنگ ایپ انسٹاگرام پر ایک اسٹوری شیئر کی جس میں اُنہوں نے اپنے پاکستانی مداحوں کے لیے محبت بھرا پیغام جاری کیا۔

بورجو کیراتلی نے اپنی انسٹاگرام اسٹوری میں لکھا کہ ’میں اپنے تمام پاکستان مداحوں کا شکریہ ادا کرنا چاہتی ہوں کہ جنہوں نے مجھے اتنا پیار دیا۔‘

ترک اداکارہ نے لکھا کہ ’روزانہ آپ کے محبت بھرے پیغامات کو پڑھ کر مجھے بہت خوشی ہوتی ہے۔‘

اُنہوں نے لکھا کہ ’پاکستان آنے کے لیے آپ کی دعوت میرے لیے اعزاز کی بات ہے، جیسے ہی حالات بہتر ہوں گے میں ضرور پاکستان آؤں گی اور آپ سب سے ملوں گی۔‘

بورجو کیراتلی نے اپنی انسٹاگرام اسٹوری میں ترکی اور پاکستانی پرچم کا ایموجی بھی لگایا۔

اِس سے قبل بورجو کیراتلی نےاپنے ایک ویڈیو پیغام میں کہا تھا کہ ’ ارطغرل غازی کے بارے میں پاکستانیوں کا جنون و جذبہ دیکھ کر بہت خوش ہوتی ہے اور اُمید کرتی ہوں کہ میں جلد ہی پاکستان کا دورہ کروں گی۔‘

اُنہوں نے اپنے ویڈیو پیغام میں پاکستانیوں سے اپنی محبت کا اظہار بھی اُردو زبان میں کیا تھا۔

یاد رہے کہ بورجو کیراتلی نے ’ارطغرل غازی‘ میں سلجان خاتون کی بہن گوکچہ خاتون کا ایک اہم کردار ادا کیا ہے، ڈرامے میں گوکچہ خاتون کی پرورش ارطغرل کے والدین کرتے ہیں اور گوکچہ خاتون ڈرامے کے مرکزی کردار ارطغرل کو پسند کرتی ہے۔

اِس سے قبل ترک سیریز کے مرکزی کردار ’ارطغرل‘، ’حلیمہ سلطان‘، ’سلیمان شاہ‘، ’تورگت الپ‘، ’عبدالرحمٰن‘، ’روشان‘، سمیت دیگر کردار نبھانے والے اداکاروں نے بھی پاکستان آنے کی خواہش ظاہر کی تھی۔