ارطغرل غازی کے مزید 2 اداکار پاکستان آنے کے خواہشمند

اسلامی فتوحات پر مبنی تُرک سیریز ’دیرلیش ارطغرل‘ میں حلیمہ سلطان کا کردار ادا کرنے والی ’اسراء بلجیک‘ کے بعد اب ’ارطغرل غازی‘ کے مزید دو اہم کردار’ دوآن بے‘ (روشان) اور اصلاحان خاتون نے بھی بہت جلد پاکستان آنے کی خواہش ظاہر کردی۔

’ارطغرل غازی‘ کے سیزن 3 میں اصلاحان خاتون کا کردار ادا کرنے والی کلثوم علی نے گزشتہ روز فوٹو اور ویڈیو شیئر نگ ایپ انسٹاگرام پر اپنی تصویر شیئر کرتے ہوئے اپنے پاکستانی مداحوں کے لیے پیغام جاری کیا۔

انسٹاگرام پر جاری کردہ اپنے پیغام میں کلثوم علی نے اپنے پاکستانی مداحوں کو ہیلو کرتے ہوئے لکھا کہ ’آپ کے محبت بھرے پیغامات اور کمنٹس کے لیے بہت شکریہ، آپ کی قیمتی تعریفوں نے مجھے بہت خوش کیا ہے۔‘

گولسم علی نے پاکستان کا دورہ کرنے کی خواہش ظاہر کرتے ہوئے لکھا کہ ’مجھے کبھی پاکستان آنے کا موقع نہیں ملا لیکن مجھے اُمید ہے کہ اِس وبا کے ختم ہونے کے بعد میں پاکستان ضرور آؤں گی اور اپنے مداحوں سے ملاقات کروں گی۔‘

اداکارہ نے مزید لکھا کہ ’تب تک کے لیے آپ سب اپنا خیال رکھیں اور استنبول سے آپ سب کے لیے بہت ساری نیک تمنائیں۔‘

آخر میں اُنہوں نے پاکستان، پاکستان جیوے پاکستان بھی لکھا۔

حلیمہ سلطان پاکستان آنے کی خواہشمند

شہرہ آفاق ترکش سیریز ’دیرلیش ارطغرل‘ یا ’ارطغرل غازی‘ میں مسلمان سپہ سالار ارطغرل کی اہلیہ’حلیمہ سلطان‘ کا کردار ادا کرنے والی اسراء بلجیک نے پاکستان آنے کی خواہش کا اظہار کردیا۔

دوسری جانب ’ارطغرل غازی‘ میں دوآن بے (روشان) کا کردار ادا کرنے والےجاوید چتین گونر نے ایک نجی میڈیا کو انٹرویو دیتے ہوئے کہا کہ ’پاکستانیوں کی جانب سے ملنے والے پیار کے لیے میں بہت خوش ہوں۔‘

جاوید چتین گونر نے کہا کہ’پاکستانیوں نے ارطغرل غازی کو جو مثبت ردعمل دیا ہے اُس کے لیے ہماری پوری ٹیم آپ کی مشکور ہے۔‘

اُنہوں نے کہا کہ ’میرے والدین نے مجھے سکھایا ہے کہ پاکستان میرا دوسرا ملک ہے۔‘

اُن کا مزید کہنا تھا کہ ’میں جلد ہی پاکستان کا دورہ کروں گا۔‘

’ارطغرل غازی‘ کی اداکارہ پاکستان سے ملنے والی محبت کی شکرگزار

عمران خان کی ہدایت پر سرکاری چینل پر نشر کی جانے والی ترکش سیریز’دیرلیش ارطغرل‘ میں ’بانو چیچک خاتون‘ کا کردار ادا کرنے والی ترکش اداکارہ ایزگی ایسما نے پاکستان سے ملنے والی بے پناہ محبت پر شکریہ ادا کیا ہے ۔

اِس سے قبل ’ارطغرل غازی‘ میں حلیمہ سلطان کا مرکزی کردار اداکرنے والی 28 سالہ اسراء بلجیک نے پاکستانی مداحوں کے محبت بھرے پیغامات کے جواب میں پاکستان آنے کی خواہش کا اظہار کیا تھا۔

اُنہوں نے لکھا تھا کہ ’وہ جلد ہی پاکستان کا دورہ کریں گی اور اپنے مداحوں سے ملاقات کریں گی۔‘

پاکستانی عوام مرد کو بہادر اور عورت کو باحجاب دیکھنا چاہتے ہیں، صاحبہ

پاکستان فلم و ٹی وی انڈسٹری کی معروف اداکارہ صاحبہ افضل ریمبو نے تصویر اور ویڈیو شیئرنگ ایپ انسٹاگرام پر تُرک سیریز ’ارطغرل غازی‘ کی تعریف کرتے ہوئے لکھا کہ ’پاکستانی مرد کو بہادر اور عورت کو باحجاب دیکھنا چاہتے ہیں۔‘

یاد رہے کہ ارطغرل غازی کے تمام اداکاروں کو پاکستانیوں کی جانب سے محبت بھرے پیغامات بھیجے جارہے ہیں، پاکستانی اُن کے سوشل میڈیا اکاؤنٹس پر کمنٹس کرکے اُن کے لیے اپنی پسندیدگی کا اظہار کرتے نظر آرہے ہیں۔

وزیر اعظم عمران خان کی ہدایت پر سرکاری ٹی وی چینل پر یکم رمضان سے اُردو زبان میں نشر کی جانے والی ترک سیریز ’ارطغرل غازی‘ نے پاکستانیوں پر اپنے سحر میں جکڑا ہوا ہے۔