فرمان الہی
نماز کے اوقات
کراچی پولیس کے چیف غلام نبی میمن کا کہنا ہے کہ جیو نیوز کے صحافی ولی بابر کے اصل قاتل کو گرفتار کرلیا گیا ہے، ملزم نائن زیرو پر بھی رہا ہے، ملزم نے اب تک چار افراد کے قتل کے بارے میں بتایا ہے۔
کراچی میں پولیس چیف غلام نبی میمن اور وزیر اطلاعات ناصر حسین شاہ نے پریس کانفرنس کرتے ہوئے کہا کہ ولی بابر جیو نیوز کے کرائم رپورٹر تھے، ولی بابر کیس کے چار گواہوں کو مختلف اوقات میں قتل کیا گیا۔
غلام نبی میمن نے کہا کہ کیس کے 8 ملزمان تھے، ایک ملزم لیاقت علی ایک سال بعد مقابلے میں مارا گیا، ولی بابر کو سپر مارکیٹ تھانے کی حدود میں نشانہ بنایا گیا، ولی بابرکے قتل کے لیے 3 موٹرسائیکلوں اور 2 موٹر کار کی ٹیمیں بنائی گئیں۔
پولیس چیف نے کہا کہ شیخ کامران کی موٹرسائیکل خراب ہوگئی اور اس کا ساتھی فرار ہوگیا، کامران نے ولی بابر پر فائرنگ کی اور پیدل موٹرسائیکل لےکر فرار ہوا۔
انہوں نے کہا کہ ملزم کامران اس دوران اپنے ٹھکانے بدلتا رہا ہے، فیصل موٹا اس کیس کا ماسٹر مائنڈ تھا، ملزمان کو ایم کیوایم ساؤتھ افریقہ سے بھی ہدایت ملتی تھی۔
پولیس چیف نے کہا کہ ملزمان کو انیس الرحمان اور عامر کی جانب سے ہدایت ملتی تھی، ملزم کامران کی رہائش کا انتظام ملزم کے بھائی احسن نے کیا۔
غلام نبی میمن نے کہا کہ ملزم کامران ہوشیار شوٹر تھا اور محتاط ہوکر کام کرتا تھا۔
ناصر حسین شاہ نے کہا کہ ولی بابر کے قاتل کو کیفر کردار تک پہنچایا جائےگا، صحافی ولی بابر پر گولی چلانے والا اصل قاتل گرفتار کرلیا گیا ہے۔
