شہری پر تشدد کرنیوالے ملزمان کو قانون کے مطابق سزا دی جائے گی، اجمل وزیر

26 جون ، 2020

مشیر اطلاعات خیبرپختونخوا اجمل وزیر نے پشاور میں پریس کانفرنس کرتے ہوئے شہری پر تشدد اور اس کی ویڈیو بنانے کے حوالے سے کہا کہ ویڈیو منظرعام پر آنے کے بعد ملوث اہلکاروں کے خلاف فوری کارروائی کی۔

اجمل وزیر نے کہا کہ جوڈیشل کمیشن تشکیل دینے کے لئے ہائیکورٹ کو مراسلہ ارسال کردیا ہے، چیف جسٹس سے ایک رکنی کمیشن کے لیے جج نامزدگی کی استدعا کی ہے۔

اُنہوں نے کہا کہ جوڈیشل کمیشن کی تحقیقاتی رپورٹ میں ملزمان کا تعین ہوگا، ملزمان کو قانون کے مطابق سزا دی جائے گی۔

مشیر اطلاعات خیبرپختونخوا اجمل وزیر نے کہا کہ تحقیقاتی رپورٹ پبلک کی جائے گی تاکہ سب حقائق سے باخبر ہوں۔

اجمل وزیر نے اس واقعےکے خلاف احتجاج کرنے والوں کے لیے کہا کہ واقعے پر احتجاج کرنے والے سرکاری املاک کو نقصان نہ پہنچائیں، قانون ہاتھ میں لینے کی کسی کو اجازت نہیں۔

اُنہوں نے کہاکہ حکومت انصاف کے تمام تقاضے پورے کر رہی ہے، چند لوگوں کے غلط کام کے باعث پوری پولیس فورس کو برا کہنا ٹھیک نہیں۔

مشیر اطلاعات خیبرپختونخوا اجمل وزیر نےکورونا وائرس کی صورتحال کے حوالے سے کہا کہ کورونا سے نمٹنے کے لیے اسپتالوں کی استعداد بڑھا رہے ہیں، 31 جولائی تک اسپتالوں میں ہائی ڈیپنڈنسی بیڈز 1644 تک بڑھائے جائیں گے۔