صدف زہرہ کی پوسٹ مارٹم رپورٹ آگئی

راولپنڈی میں قتل ہونے والی سوشل میڈیا بلاگر علی سلمان کی اہلیہ صدف زہرہ کے پوسٹ مارٹم کی رپورٹ موصول ہوگئی ہے۔

پوسٹ مارٹم رپورٹ کے مطابق 38 سالہ صدف زہرہ کی ہلاکت 29 جون کی دوپہر 2 بجے ان کی رہائش گاہ پر واقع ہوئی۔

پوسٹ مارٹم رپورٹ میں بتایا گیا کہ صدف زہرہ کے دائیں گال پر نشان، ہونٹ سوجے ہوئے اور چہرے پر نیلے نشان موجود ہیں جبکہ لاش کےخون، جگر، گردے اور معدے کے نمونے فارنزک لیبارٹری بھجوا دیئے گئے ہیں۔

موت کی وجہ سے متعلق حتمی رپورٹ فارنزک لیبارٹری کے نتائج کے بعد اخذ کی جائے گی، ابتدائی جائزہ میں صدف زہرہ کی موت کا سبب دم گھٹنا معلوم ہوتا ہے۔

بلاگر علی سلمان کی اہلیہ کا قتل، پولیس نے اہل علاقہ کے بیانات ریکارڈ کرلیے

مقتولہ کی ہمشیرہ ڈاکٹر مہوش زہرا نے کہا ہے کہ علی سلمان اور صدف زہرا کے درمیان گزشتہ ایک سال کے دوران اکثر لڑائی جھگڑا رہتا تھا۔

واضح رہے کہ سوشل میڈیا بلاگر علی سلمان کا کہنا ہے کہ اُن کی اہلیہ صدف زہرہ نے خودکشی کی ہے جبکہ اس حوالے سے مقتولہ کی ہمشیرہ ڈاکٹر مہوش زہرہ نے کہا ہے کہ علی سلمان اور صدف زہرہ کے درمیان گزشتہ ایک سال سے اکثر لڑائی جھگڑا رہتا تھا۔

ڈاکٹر مہوش زہرہ کا کہنا تھا کہ ان کے بہنوئی نے ان کی بہن کا قتل کر کے اسے خودکشی ظاہر کرنے کی کوشش کی۔

پولیس حکام کے مطابق علی سلمان سے متعلق اہلِ علاقہ کا کہنا ہے کہ علی سلمان اپنی اہلیہ پر تشدد کرتا تھا اور گالم گلوچ کا بھی عادی ہے جبکہ اہل محلہ کے ساتھ بھی نارواسلوک روا رکھتا ہے۔