فرمان الہی
نماز کے اوقات
مسلم لیگ نون کےرہنما احسن اقبال کے خلاف نارووال اسپورٹس سٹی کیس میں آج بھی ریفرنس دائر نہ ہوا جس پر اسلام آباد کی احتساب عدالت نے کیس کی سماعت 22 ستمبر تک ملتوی کر دی۔
احتساب عدالت اسلام آباد کے جج محمد بشیر نے کیس کی سماعت کی، رہنما مسلم لیگ نون احسن اقبال اپنے وکیل کے ہمراہ عدالت میں پیش ہوئے۔
دورانِ سماعت قومی احتساب بیورو (نیب) کی جانب سے آج بھی احسن اقبال کے خلاف ریفرنس دائر نہ کیا جا سکا۔
احسن اقبال کے وکیل نے عدالت میں مؤقف اختیار کیا کہ احسن اقبال کو نیب نے گرفتار کیا لیکن تاحال ریفرنس دائر نہ کر سکا۔
انہوں نے کہا کہ احسن اقبال کا جسمانی ریمانڈ بھی لیا گیا، انہیں جیل بھی بھجوایا گیا مگر ان کے خلاف ریفرنس دائر نہ ہوا۔
وکیل نے مزید کہا کہ چیئرمین نیب کیس میں اب تک ریفرنس دائر نہ کرنے کی وضاحت نہیں کر سکے ہیں۔
انہوں نے یہ بھی کہا کہ نیب لوگوں کو گرفتار کر رہا ہے، ان پر ایک تلوار لٹکی ہوئی ہے، ایسا نہیں ہونا چاہیے۔
نیب پراسیکیوٹر نے عدالت کو بتایا کہ ریفرنس کا ڈرافٹ منظوری کے لیے نیب ہیڈ کوارٹرز کو بھجوا دیا گیا ہے۔
یہ بھی پڑھیئے:۔
حکومت نے پاکستان کو خارجہ میدان میں تنہا کر دیا، احسن اقبال
احتساب عدالت کے جج محمد بشیر نے کہا کہ آج تو وکیلِ صفائی نے نیب کی بہت کلاس لے لی۔
انہوں نے استفسار کیا کہ نیب بتائے کہ کب تک ریفرنس دائر کیا جائے گا؟
نیب کے تفتیشی افسر نے جواب دیا کہ جیسے ہی ہیڈ کوارٹرز سے منظوری ہو گی، عدالت کو آگاہ کر دیں گے۔
عدالت نے ریفرنس دائر ہونے تک ملزمان کو مرضی سے سماعت میں آنے کی اجازت دے دی۔
