فرمان الہی
نماز کے اوقات
برسلز( حافظ انیب راشد ) یورپین دارالحکومت برسلز میں مقیم مسلم لیگی رہنماؤں نے مطالبہ کیا ہے کہ مریم نواز کی جان کو خطرہ ہے ، ان کے تحفظ کیلئے فوری طور پر اقدامات اٹھائے جائیں ۔ ان خیالات کا اظہار مسلم لیگ ن یوتھ ونگ آزاد کشمیر کے رہنما اور وزیراعظم آزاد کشمیر کے کوآرڈینیٹر راجہ محمد خالد، مسلم لیگ ن بلجیم کے بانی رہنما شیخ محمد الیاس، اصغر بٹ، سونی بٹ، کاشف صادق، فلک شیر نے کیا۔ مقررین نے احتجاج سے خطاب کرتے ہوئےکہا کہ مریم نواز کے پاس کبھی بھی کوئی عوامی عہدہ نہیں رہا، اس لحاظ سے کسی کمیشن ، کک بیک یا مالی مفادات کے لیے کسی عوامی دفتر کے غلط استعمال کا کوئی امکان نہیں ، انہوں نےکہا احتساب کا دفتر ، وزیر اعظم کی سربراہی میں وفاقی حکومت کے کہنے پر عمل پیرا ہے جو صرف سابق وزیر اعظم نواز شریف اور ان کی صاحبزادی مریم نواز کی شہرت کو داغدار بنانا چاہتا ہے جو موجودہ حکمران جماعت کی اصل سیاسی مخالف سمجھے جاتے ہیں۔مقررین نے کہا کہ اگرچہ مریم نواز کو متعلقہ عدالت میں پیش ہونے کے لئے نوٹس کو چیلنج کرنے کا حق تھا لیکن وہ کسی بھی انکوائری میں تعاون کرنےکیلئےحاضر ہوئیں، مریم نواز کبھی کسی غلط کام میں ملوث نہیں رہی ہیں، رہنماؤں نے الزام عائد کیا کہ 11 اگست کو نیب کے دفتر کے قریب مریم نواز کی گاڑی کو لیزر گن سے نشانہ بنایا گیا جس سے ان کی جان کو شدید خطرہ نظر آتا ہے۔ اس موقع پر مقررین نے موجودہ پی ٹی آئی کی حکومت کو شدید تنقید کا نشانہ بنایا ۔ انہوں نے کہا کہ لاہور میں نئی پولیس تعیناتیوں کے ذریعے حکومت اپنے سیاسی مخالفین خصوصی طور پر مسلم لیگ ن کے کارکنوں کو ڈرانا اور دھمکانا چاہتی ہے جو قابل قبول نہیں ۔احتجاج میں مسلم لیگ ن کے رکن قومی اسمبلی علی زاہد نے ٹیلیفون کے ذریعے خطاب کیا اور کارکنوں کو اپنی پارٹی کا پیغام پہنچایا ۔ شرکاء احتجاج نے اپنی جماعت کے حق اور موجودہ حکومت کے خلاف نعرے بازی بھی کی۔
