کراچی ہیٹ ویو کی لپیٹ میں

کراچی ہیٹ ویو کی لپیٹ میں آگیا ہے، محکمۂ موسمیات کی پیش گوئی کے مطابق شہر میں 24 گھنٹوں کے دوران موسم گرم، کبھی شدید گرم اور خشک رہنے کا امکان ہے۔

کراچی: پورا ہفتہ ہیٹ ویو کا امکان

محکمۂ موسمیات نے کراچی میں پورا ہفتہ گرمی کی شدت برقرار رہنے کی پیش گوئی کرتے ہوئے شہرِ قائد سمیت سندھ بھر کے لیے ہیٹ ویو کا الرٹ جاری کر دیا ہے۔

محکمۂ موسمیات کا کہنا ہے کہ کراچی میں گزشتہ رات خنک ہوائیں چلیں، شمال اور شمال مشرق کی جانب سے چلنے والی خشک ہواؤں کے باعث رات خنکی رہی، جس کی وجہ سے کم سے کم درجۂ حرارت بھی 2 ڈگری گر گیا۔

شہرِ قائد کا کم سے کم درجۂ حرارت 23 اعشاریہ 5 ڈگری سینٹی گریڈ ریکارڈ کیا گیا جبکہ زیادہ سے زیادہ درجۂ حرارت 39 سے 41 ڈگری سینٹی گریڈ رہنے کا امکان ہے۔

محکمۂ موسمیات کا یہ بھی کہنا ہے کہ کراچی میں شمال سے 12 کلو میٹر فی گھنٹہ کی رفتار سے ہوائیں چل رہی ہیں جن میں نمی کا تناسب 12 فیصد ہے۔