پولیو سے محفوظ پاکستان ہمارا مشن ہے،عثمان بزدار

24 اکتوبر ، 2020

وزیر اعلیٰ پنجاب عثمان بزدار نے پولیو سے بچاؤ کے عالمی دن کے موقع پر اپنے بیان میں کہا ہے کہ پولیو سے محفوظ پاکستان ہمارا مشن ہے۔

لاہور سے جاری کردہ اپنے بیان میں وزیر اعلیٰ پنجاب عثمان بزدار نے کہا کہ موذی مرض پولیو کا مکمل خاتمہ حکومت کی ترجیحات میں شامل ہے۔

عثمان بزدار نے کہا کہ بچوں کو صحت مند مستقبل دینے کے لیے تمام وسائل بروئے کار لائے جارہے ہیں جبکہ انسداد پولیو کے لیے محکمہ صحت کے ساتھ انتظامیہ کو بھی متحرک کیا گیا ہے۔

وزیراعلیٰ پنجاب نے کہا کہ صوبے میں انسداد پولیو اقدامات کی ذاتی طور پر مانیٹر کررہاہوںجبکہ پنجاب حکومت نے ڈبلیو ایچ او کی گائیڈ لائنز کی روشنی میں انسداد پولیو کیلئے ایس او پیز تیار کئے ہیں۔

اپنے بیان میں عثمان بزدار نے کہا کہ ان ایس او پیز پر عملدرآمد اور باقاعدہ مانیٹرنگ کی جارہی ہے، اس کے علاوہ بر وقت ویکسینیشن کے ذریعے بچوں کو پولیو سے بچایا جا سکتا ہے۔