گستاخانہ خاکوں کی اشاعت، پاکستان کا فرانس سے سفیر واپس بلانے پر غور

گستاخانہ خاکوں کی اشاعت کے معاملے پر پاکستان نے فرانس سے اپنا سفیر واپس بُلانے پر غور شروع کردیا۔

جیو نیوز کے پروگرام ’کیپیٹل ٹاک‘ میں میزبان حامد میر سے گفتگو کرتے ہوئے وزیرِ خارجہ شاہ محمود قریشی نے کہا کہ فرانس سے اپنے سفیر کو مشاورت کے لیے بلوانا پڑا تو بلائیں گے۔

انھوں نے یہ بھی کہا کہ سفیر واپس بُلانے کے معاملے میں پارلیمنٹ سے رہنمائی لیں گے۔

حالیہ دہشت گردی کے واقعات سے متعلق سوال پر شاہ محمود قریشی نے کہا کہ اس میں بھارت ملوث ہوسکتا ہے۔

اسلام مخالف مہم پر اجتماعی فیصلے کا وقت آگیا، شاہ محمود قریشی

وزیر خارجہ شاہ محمود قریشی کا کہنا ہے کہ فرانس کے سفیر کو آج دفتر خارجہ میں طلب کیا گیا ہے جہاں ان سے اسلام مخالف مہم پر احتجاج کیا جائے گا۔

انہوں نے بھارت کے ساتھ مذاکرات کو خارج از امکان قرار دیتے ہوئے کہا کہ کشمیر میں جاری بھارتی ظلم و ستم کے باعث پاکستان بھارت سے مذاکرات نہیں کرسکتا۔

واضح رہے کہ فرانس میں گستاخانہ خاکوں کی تشہیر کے بعد پاکستان سمیت مسلم امہ میں غم و غصہ پایا جارہا ہے۔

ایک روز قبل پاکستانی پارلیمنٹ میں گستاخانہ خاکوں کی تشہیر کے معاملے پر فرانس کے خلاف مذمتی قرارداد پیش کی گئی جو متفقہ طور پر منظور کی گئی تھی۔