آپ آف لائن ہیں
اتوار3؍جمادی الثانی 1442ھ 17؍جنوری2021ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

عمران فاروق کیس: کاشف خان کامران اور افتخار حسین مطلوب دہشتگردوں کی فہرست میں شامل

متحدہ قومی موومنٹ ( ایم کیو ایم ) کے مقتول رہنما ڈاکٹر عمران فاروق کیس میں اہم پیشرفت سامنے آئی ہے۔ کاشف خان کامران اور افتخار حسین کو مطلوب دہشتگردوں کی فہرست میں شامل کرلیا گیا۔

انسداد دہشتگردی عدالت نے کاشف خان کامران اور افتخارحسین کے دائمی وارنٹ جاری کئے تھے۔


افتخارحسین پر عمران فاروق کے قتل کی سازش اور منصوبہ بندی کا الزام ہے۔ جبکہ کاشف خان کامران قتل کیس میں ملزم کے طور پر نامزد ہیں۔

واضح رہے کہ جون 2020ء اسلام آباد کی انسدادِ دہشت گردی کی عدالت نے عمران فاروق قتل کیس کے تینوں گرفتار ملزمان خالد شمیم، محسن علی اور معظم علی کو عمر قید کی سزا سنائی تھی۔

عدالت نے ڈاکٹر عمران فاروق کے ورثاء کو 10، 10 لاکھ روپے معاوضہ ادا کرنے کا حکم بھی دیا تھا۔

عدالت نے بانی ایم کیو ایم اور افتخار حسین کے علاوہ اشتہاری ملزمان محمد انور اور کاشف کامران کے دائمی وارنٹِ گرفتاری بھی جاری کیے تھے۔

اڈیالہ جیل میں قید ڈاکٹر عمران فاروق قتل کیس کے ملزمان خالد شمیم، محسن علی اور معظم علی نے کیس کا فیصلہ ویڈیو لنک کے ذریعے سنا تھا، جبکہ ملزمان کے اہلِ خانہ فیصلہ سننے کے لیے کمرۂ عدالت میں موجود تھے۔

یاد رہے کہ ایم کیو ایم رہنما ڈاکٹر عمران فاروق کو 16 ستمبر 2010ء کو برطانیہ میں قتل کیا گیا تھا۔

قومی خبریں سے مزید