آپ آف لائن ہیں
منگل5؍جمادی الثانی 1442ھ 19؍جنوری 2021ء
  • بانی: میرخلیل الرحمٰن
  • گروپ چیئرمین و ایگزیکٹوایڈیٹر: میر جاوید رحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group

عمران خان کی تُرک سیریز ‘یونس ایمرے‘ دیکھنے کی پرزور تجویز

عمران خان کی ہدایت پر شہرہ آفاق تُرک سیریز ‘ارطغرل غازی‘ کو اردو زبان میں سرکاری ٹیلی ویژن پر نشر کیے جانے کے بعد اب وزیراعظم کی ہدایت پر ہی معرفت پر مبنی ڈرامے ’راہِ عشق‘ کو قومی زبان میں نشر کیا جارہا ہے۔

عمران خان نے نوجوان کو تجویز دی ہے کہ وہ پی ٹی وی پر نشر کی جانے والی نئی تُرک سیریز ’یونس ایمرے‘ ضرور دیکھیں۔

عمران خان نے اپنے ٹوئٹ میں کہا کہ ’صوفی ازم (معرفت) میں دلچسپی رکھنے والوں کیلئے میری پُر زور تجویز ہےکہ وہ سلسلہ وار ڈرامہ ’یونس ایمرے‘ ضرور دیکھیں جسے پی ٹی وی پر نشر کیا جا رہا ہے۔‘

پی ٹی وی ہوم پر ’یونس ایمرے‘ کو ’راہِ عشق کے نام سے اردو  میں ڈب  کرکے پیش کیا جارہا ہے۔  مذکورہ سیریز ہفتے میں 2 دن نشر ہوتی ہے۔

علاوہ ازیں پی ٹی وی کی جانب سے ڈرامے کا او ایس ٹی بھی جاری کیا گیا ہے جو بلھے شاہ کے کلام پر مبنی ہے اور اسے پاکستان کے معروف گلوکار ابرار الحق نے پڑھا ہے۔

’یونس ایمرے‘ کو ترکی کے سرکاری ٹی وی چینل ٹی آر ٹی ون پر نشر کیا گیا تھا اور اس ڈرامے کا پہلا سیزن 2015 جبکہ دوسرا سیزن 2016 میں نشر کیا گیا تھا اور ڈرامے کی مجموعی طور پر 44 اقساط ہیں۔


یونس ایمرے ایک سال سے بھی مختصر عرصے میں پاکستان کے سرکاری چینل پر نشر ہونے والا دوسرا ترک ڈرامہ ہے تاہم یہ ابھی ’ارطغرل غازی‘ جتنا مقبول نہیں ہوا، جس نے نشر ہوتے ہی عوام مقبولیت حاصل کرلی تھی۔

خیال رہے کہ اسلامی فتوحات پر مبنی ڈرامے ’ارطغرل غازی‘ کو وزیراعظم عمران خان کی ہدایت پر پی ٹی وی پر نشر کیا گیا اور ان دنوں اس ڈرامے کا دوسرا سیزن نشر کیا جارہا ہے۔

اس سے قبل رواں برس مئی میں پاکستان تحریک انصاف (پی ٹی آئی) کے سینیٹر فیصل جاوید خان نے انکشاف کیا تھا کہ وزیر اعظم عمران خان نے اپنی خواہش کا اظہار کرتے ہوئے کہا کہ وہ چاہتے ہیں کہ ’یونس ایمرے‘ کو بھی پاکستان میں نشر کیا جائے۔

’یونس ایمرے‘ ڈرامہ دراصل 13 ویں صدی کے ترک صوفی شاعر یونس ایمرے کی زندگی پر بنایا گیا ہے۔

یونس امرے کو ترکوں کے صوفی شاعر اور اہم ادبی اوائلی شخصیات میں شمار کیا جاتا ہے اور ترک کی نئی نسل بھی ان کی خدمات کا اعتراف کرتی ہے۔

انہی کی زندگی اور خدمات کو خراج تحسین پیش کرنے کے لیے محمد بوزداغ نے ان کی زندگی پر ’یونس ایمرے‘ نامی ڈرامہ بنایا جو دیکھتے ہی دیکھتے ترکی میں مشہور ہوگیا۔

یونس ایمرے کون تھے؟

ترکی اور وسطی ایشیا کے ممالک میں صوفی شاعر، درویش اور روحانی شخصیت کے طور پر مشہور یونس ایمرے 1238 میں پیدا ہوئے۔

رومی ثانی کہلائے جانے والے اپنی زندگی کے ایک حصے میں تصوف سے بیزار تھے اسی لئے قونیہ میں خود کو شریعت کے مسئلے سمجھنے میں مصروف رکھا۔

قابلیت، ذہانت، روشن فکر اور اجلے کردار کا پیکر یونس ایمرے مدرسے سے فارغ ہوئے تو انہیں قونیہ سے دور مضافاتی قصبے نالیحان میں قاضی بنا کر بھیج دیا گیا۔

اسی شہر کے ایک صوفی بزرگ ’تاپ دوک ایمرے‘ سے ملاقاتوں کے بعد یونس ایمرے کی زندگی میں ایسا موڑ آیا کہ ظاہر پر یقین رکھنے والے قاضی یونس نے سرکاری عہدہ اور پرآسائش زندگی چھوڑ کر درگاہ کا رخ کرلیا۔

ترکی کے معروف صوفی بزرگ حاجی بکتاش ولی کی ہدایت پر مشہور عالم تاپ دوک ایمرے سے یونس ایمرے نے قرآن و حدیث کے علم میں کمال حاصل کیا اور انہی کی خدمت میں روحانیت کے اسرار و رموز سیکھنے کیلئے 40 سال گزارے۔

ابتداء میں شاعری کو گمراہی سمجھنے والے یونس ایمرے کے کلام میں جہاں صوفی ازم، واحدت الوجود، دنیا کی بے ثباتی، انسانیت سے محبت و پیار، امن اور بھائی چارے کا پرچار ملتا ہے وہاں ترکی کی ابتدائی اور قدیم تہذیب و ثقافت کا بھی پتہ چلتا ہے.

نہایت پُراثر لب و لہجے کے مالک اور شیریں گفتار یونس ایمرے جب 1320 عیسوی میں دنیا سے رخصت ہوئے تو اناطولیہ سمیت ہر طرف ان کا چرچا تھا۔

سات صدیاں بیت جانے کے بعد آج بھی وہ ترکوں کی محبوب شخصیات میں سے ایک ہیں۔ ترکی باشندوں میں یونس ایمرے کا کلام آج بھی مقبول ہے اور ان کا نام نہایت عزت اور احترام سے لیا جاتا ہے۔

1991ء میں یونس ایمرے کی 750ویں سالگرہ کے موقع پر اقوام متحدہ نے متفقہ طور پر اس سال کو پوری دنیا میں ’یونس ایمرے‘ کے سال کے طور پر عالمی سطح پر منایا ۔

ترکی میں کرنسی پر تصاویر کے علاوہ کئی اہم مقامات اور عمارتوں میں یونس ایمرے کے مجسمے نصب ہیں۔

خاص رپورٹ سے مزید