فرمان الہی
نماز کے اوقات
ہر کوئی اپنے گھر کو باکمال اور باذوق بنانا چاہتا ہے لیکن جب بات ہو ٹی وی لاؤنج کی تو سبھی چاہتے ہیں کہ ان کا ٹی وی لاؤنج اعلیٰ اور منفرد نظر آئے۔ ٹی وی جو کبھی ایک خواہش ہوا کرتی تھی، اب وقت اور ٹیکنالوجی نے اسے ہر گھرکی ضرورت بنا دیاہے۔
لہٰذا، ٹی وی لاؤنج کی سجاوٹ اور زیبائش کے پیش نظر ٹیلی ویژن کے بھی نت نئے انداز، ڈیزائن اور اقسام متعارف کروائے جاچکے ہیں۔ ٹی وی اسکرینوں کے لیےایل سی ڈی، پلازما، فلیٹ، ایل ای ڈی، ریٹینا، کرسٹل اور تھری ڈی جیسی ٹیکنالوجیز مارکیٹ میں دستیاب ہیں۔
قصہ مختصر یہ کہ ماضی کا ڈبے نماٹی وی اب ایک خوبصورت فریم میں منتقل ہوکر شاندار اندازاپنا چکا ہے۔ آپ کے ٹی وی لاؤنج کی زیبائش کے لیے کچھ شاندار اور جدید ترین خیالات پیشِ خدمت ہیں۔
جدید اور دلکش
محدود احاطے میں ٹی وی سیٹ اور اس کے جملہ لوازمات منظم کریں۔ سفید اور متناسب رنگوں کے امتزاج اور روشن پس منظر کے ساتھ دیوار پر لگی سینما سائز اسکرین ٹی وی لاؤنج کی شان وشوکت بڑھاتی ہے۔
شاندار نمونہ
محدود احاطے اور وسائل کے ساتھ ترتیب دیے گئے ٹی وی لاؤنج کو مثالی اورماہرانہ انداز میں منظم کیا جاتا ہے۔ خصوصاً ٹی وی اسٹینڈ اور پینل کے فرنیچرکو حسبِ ضرورت ڈیزائن کرکے جگہ اور پیسے دونوں کی بچت ہوجاتی ہے۔ سرخ رنگوں کا امتزاج مرکز نگاہ ہوتا ہے۔
ایک شاندار منظر
اگر آپ کے گھر میں بڑے سے کمرے میں ایک طرف ڈائننگ روم اور دوسری طرف بیٹھک کا انتظام کیا گیا ہے تو دیوار پر ٹی وی اس طرح نصب کریں کہ دونوں اطراف بیٹھنے والے اس سے محظوظ ہوسکیں۔ اگر کمرے سے باہر سبزہ زار یا پودے نظر آئیں تو ٹی وی کے لیے اس سے اچھی جگہ کوئی اور نہیں ہوسکتی۔
اُوپری شیلف کے نیچے ٹی وی
ایک چھوٹے ٹی وی لاؤنج میں سامان رکھنے کی اضافی جگہ کا مہیا ہونا اہمیت کا حامل ہوتا ہے۔ اگر شیلف اُونچائی پر بنا ہواہے تو اس کے نیچے دیوار پر ٹی وی لگائیں۔ شیلف میں آپ مختلف سامان رکھ سکتے ہیں۔
بیڈ روم میں ٹی وی
اگر کسی بیڈروم میں ٹی وی رکھا ہو تووہ کمرے کا مرکزی نکتہ سمجھا جاتا ہے۔ ٹی وی دیوار میں لگانے کے بجائے اس کے لیے مخصوص الماری اور متعلقہ لوازمات خوبصورت سجاوٹ فراہم کرتے ہیں۔ خوابگاہ کا بیرونی پس منظر اور سینما سائز اسکرین پر وال ٹو وال الماری اور کثیرالمقاصد فرنیچر کی شان ہی نرالی ہوتی ہے۔
شیلف کے درمیان
کمرے میں دیوار کے ساتھ اگر ایک بڑا شیلف موجود ہے تو اس کے درمیان میں ٹی وی رکھ کر چھوٹی اور مکمل طور پر فعال جگہ کا بہترین استعمال کیا جاسکتا ہے۔ اس طرح کی شیلف بنوائی بھی جاسکتی ہیں تاکہ آپ اپنی پسند کے سائز کا ٹی وی اس کے بیچ میں رکھ سکیں۔ شیلف کے سامنے مناسب فاصلے پر خوبصورت اور آرام دہ صوفے رکھیں۔ یہ گھر میں ٹی وی دیکھنے کی ایک بہترین جگہ ثابت ہوگی۔
شیلف سے اور جگہ بنائیں
عام طور سے دیواروں پر سجاوٹی اشیا (جیسے کہ آئینے، پینٹنگز وغیرہ) لگاکر ٹی وی لاؤنج کی خوبصورتی کو بڑھایا جاتا ہے۔ جگہ کے حساب سے ڈیزائن کیے گئے شیلف بھی دیواروں کو خوبصورت بناتے ہیں۔ ان میں آپ ایسی اشیا رکھیں جوکمرے کے ماحول سے مطابقت رکھتی ہوں۔
کلیکشن وال
آپ کی پسندیدہ کتابوں کا مجموعہ ہو یا کچھ اور، ہر چیز بڑی ترتیب سے کمرے میں موجود شیلفوں میں رکھی جا سکتی ہے۔ زیریں فلور پر میچنگ نمونے کا ٹی وی اسٹینڈ رکھیں اور اس پر ٹی وی رکھیں۔
ٹی وی اسٹینڈ
اگر آپ کے پاس اب بھی پرانے اسٹائل کا فلیٹ اسکرین ٹی وی ہے تو پھر دیوار کے ساتھ خوبصورت ڈیزائن کا اسٹوریج والا ٹی وی اسٹینڈ رکھیں۔ اس اسٹینڈ کے اندر والی جگہ کو آپ آرائش کے لیے استعمال کریں۔ اسٹینڈ کےلیے شیشوں کے سلائیڈ والے دروازوں کا انتخاب کیا جاسکتا ہے۔
اگر غیرنمائشی چیزیں اسٹوریج کرنے کا ارادہ ہے تو سلائیڈ والےدروازوں میں شیشے کے بجائے لکڑی یا بورڈ استعمال کریں۔ اس کے علاوہ خوبصورتی اور اعلیٰ ذوق سے بنایا گیا سادہ مگر معیاری ٹی وی اسٹینڈ دیگر لوازمات کے ساتھ ایک شاندار نظارہ پیش کرتا ہے۔
دیوار میں چنوانا
اگر آپ کے لاؤنج کا سائز چھوٹے ہے اور اس میں تھوڑی گہرائی چاہتے ہیں تو ٹی وی سیٹ کو دیوار میں چنوا دیں۔ یہ انداز آپ کے ٹی وی لاؤنج کو کلاسیکی انداز دے گا۔
