• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

شہر میں تین نئے کمرشل پارکنگ پلازے بنائے جائینگے، کمشنر

میرا شہر
اسلام آباد
24 دسمبر ، 2020
راولپنڈی(اپنے رپورٹر سے ) شہر کے مصروف تجارتی علاقوں میں تین نئے کمرشل پارکنگ پلازے پبلک پرائیویٹ شراکت داری کے تحت بنائیں جائیں گے جبکہ آر ڈی اے پارکنگ پلازہ میں توسیع کی جائیگی جو راولپنڈی شہر میں ٹریفک کے مسائل حل کرنے میں مددگار ہونگے۔ بنی مارکیٹ، اولڈ راولپنڈی میٹرو پولیٹن کارپوریشن کے دفتر اور کمرشل مارکیٹ میں نئے کمرشل پارکنگ پلازے بنائینگے جو سات سات منزلہ ہونگے جبکہ راولپنڈی ڈویلپمنٹ اتھارٹی کے پارکنگ پلازہ میں تین منزلوں کا اضافہ کیا جائیگا۔ پارکنگ پلازوں میں گاڑیوں اور موٹر سائیکلوں کی پارکنگ کے علاوہ دکانوں، ہوٹلز اور گوداموں کی بھی منصوبہ بندی کی گئی ہے۔ یہ باتیں کمشنر ،کیپٹن (ر) محمد محمود نے کمشنر آفس میں پارکنگ پلازوں کے منصوبہ پر پیش رفت کا جائزہ لینے کے لئے اجلاس کی صدارت کرتے ہوئے کیں۔کمشنر نے کہا کہ تمام پارکنگ پلازوں کے نقشے، فنانشل ماڈلز اور لاگت کے تخمینے تیار ہو چکے ہیں، اور ان پلازوں پر کام شروع کرنے کیلئے جلد سرمایہ کاروں کی کانفرنس بلائی جائے گی۔ انہوں نے کہا کہ ان تمام پلازوں کی مدت تعمیر دو سال کے قریب ہے اور ان میں جدید کمپیوٹرائزڈ پارکنگ نظام بھی ہو گا ۔ معذور افراد کی پارکنگ کی مخصوص جگہ ہوگی اور مساجد بھی موجود ہونگی۔ انہوں نے کہا کہ تمام پلازے پبلک پرائیویٹ شراکت داری کے ماڈل پر چلائے جائیں گے جس کی وجہ سے سرکاری اراضی کا بہترین استعمال ہو سکے گا اور ان پارکنگ پلازوں میں دکانوں اور ہوٹلز کے کرایوں کی مد میں ماہانہ لاکھوں کی آمدن بھی ہوگی۔
تازہ ترین