پارٹی سے نکالے گئے رہنماؤں کو فیصلے کی کاپی بھجوا دی، ترجمان جے یو آئی

جمعیت علما ئے اسلام (ف) کے ترجمان محمد اسلم غوری نے کہا ہے کہ جماعت سے نکالے گئے رہنماؤں کو فیصلے کی کاپیاں بھجوادی گئی ہیں۔

وضاحتی بیان میں جے یو آئی ترجمان نے کہا کہ 4 رہنماؤں کو پارٹی فیصلوں سے انحراف کرنے پر نکال دیا گیا ہے۔

انہوں نے مزید کہا کہ پارٹی سے خارج کیے گئے افراد کی رائے کا پارٹی سے کوئی تعلق نہیں ہوگا۔

محمد اسلم غوری نے یہ بھی کہا کہ مولانا محمد خان شیرانی، حافظ حسین احمد، مولانا گل نصیب خان اور مولانا شجاع الملک پارٹی سے خارج کیے گئے ہیں۔

مولانا فضل الرحمٰن ایک بیان میں کہہ چکے ہیں مولانا شیرانی اپنے بیانات کے باعث بے نقاب ہوچکے ہیں۔

دوسری طرف پارٹی سے نکالے جانے پر حافظ حسین احمد نے ردعمل کا اظہار کیا اور ان سمیت دیگر رہنماؤں کےاخراج کے فیصلے کو ڈکٹیٹر شپ سے تعبیر کیا ہے۔