فرمان الہی
نماز کے اوقات
اسلام آباد، کراچی (نمائندہ جنگ، اسٹاف رپورٹر) پاکستان پیپلزپارٹی پارلیمنٹیرینز کے صدر آصف علی زرداری اورچیئرمین پاکستان پیپلز پارٹی بلاول بھٹو زرداری نے شہید بینظیر بھٹو کو ان کے 13 ویں یوم شہادت پر شاندار الفاظ میں خراج عقیدت پیش کرتے ہوئے اس عزم کا اعادہ کیا ہے کہ شہید بینظیر بھٹو کے مشن کو ہر قربانی دیکر بھی پایہ تکمیل تک پہنچانے کی جدوجہد جاری رہے گی۔ بینظیر بھٹو شہید وژن کے مطابق ملک میں حقیقی جمہوریت قائم کرینگے۔ ملک میں حقیقی جمہوریت کے قیام اور عوام کو غربت، بیروزگاری اور ناانصافی سے نجات دلانے کیلئے ہمیں بینظیر بھٹو کے نقش قدم پر چلنا پڑیگا۔ سیاہ طاقتوں نے سازش کے تحت انہیں قتل کیا، لیکن وہ اُن سے جیت نہیں سکے، اپنے پیغام میں انہوں نے کہا کہ بینظیر بھٹو اسلامی دنیا میں ایک بیٹی، بہن، اہلیہ، والدہ اور دلوں پر راج کرنے والی ایک رول ماڈل رہی ہیں اور جن کا جانی نقصان غیر جانبدار تاریخ صدیوں تک محسوس کرے گی، پوری قوم کو متحد کیا، جمہوریت کی بحالی عوام کی بنیادی آزادیوں کیلئے انہوں نے اپنی زندگی کا ہر لمحہ اپنی قوم اور اس کے غریب شہریوں، نوجوانوں، بچوں اور خواتین کیلئے کام کرنے میں صرف کیا۔ پسماندہ طبقات، خواتین کو بااختیار بنانے اور محروم عوام کے لیئے جدوجہد کے دوران بڑی بہادری سے قید و بند، ظلم اور کردار کشی جیسے ہتھکنڈوں کا سامنا کیا، لیکن کبھی خاموش ہوکر نہیں بیٹھیں، شہید بینظیر بھٹو کی قربانیاں تاریخ اور عوام کے دلوں پر نقش ہو چکی ہیں۔
