X
پاکستان شوبز انڈسٹری کی سینئر اداکارہ بشریٰ انصاری نے زندگی میں پہلی بار لاہور موٹروے کے ذریعے اسلام آباد کا سفر کیا۔
سوشل میڈیا سائٹ انسٹاگرام پر بشریٰ انصاری نے اپنی ایک ویڈیو شیئر کی ہے جس میں اداکارہ کے ہمراہ لاہور موٹروے پولیس کے اہلکاروں کو بھی دیکھا جاسکتا ہے۔
ویڈیو میں بشریٰ انصاری نے لاہور موٹروے پولیس کی خدمات کو خراجِ تحسین پیش کرتے ہوئے کہا کہ ’یہ بڑی ہی عجیب بات ہے کہ میں پاکستان کی شہری ہونے کی باوجود بھی زندگی میں پہلی بار لاہور موٹروے آئی ہوں۔‘
بشریٰ انصاری نے کہا کہ ’میں بذریعہ موٹروے اسلام آباد جارہی ہوں اور جب میں یہاں پہنچی تو موٹروے پولیس نے بڑے ہی شاندار انداز میں میرا استقبال کیا جس کے لیے میں ان کی بہت شُکرگزار ہوں۔‘
اداکارہ نے اپنے ویڈیو پیغام میں لاہور موٹروے پر سفر کرنے سے متعلق چند احتیاطی تدابیر بھی بتائیں۔
بشریٰ انصاری نے ویڈیو کے کیپشن میں لکھا کہ ’ہماری پولیس کا احترام کریں، ان سے محبت کریں اور ان کی خدمات کے لیے شکریہ ادا کریں۔‘
اس کے علاوہ بشریٰ انصاری نے موٹروے پولیس کے اہلکاروں کے ساتھ اپنی ایک تصویر بھی انسٹاگرام پر شیئر کی ہے۔
خیال رہے کہ پاکستان کی معروف اداکارہ بشریٰ انصاری 1978سے شوبز انڈسٹری کا حصہ ہیں اور طویل عرصے سے انڈسٹری پر راج کررہی ہیں۔
