تعمیراتی کنٹریکٹر کے انتخاب سے متعلق مشورے

مکان کی تعمیر یا تعمیرِ نو ایک مشکل مرحلہ ہے، جس میں وقت، پیسہ اور توانائی صرف ہوتی ہے۔ ایسے میں یہ ضروری ہوجاتا ہے کہ تمام وسائل کا بہترین استعمال کیا جائے، جس کے لیے آپ کے پاس ایک منصوبے کا ہونا ضروری ہے جیسے کہ پروجیکٹ کے بارے میں معلومات یا آپ کتنے عرصے میں اس کے مکمل ہونے کے خواہشمند ہیں؟ وغیرہ وغیرہ۔ عام طور پر اس کام کے لیے آرکیٹیکٹ ہائر کیا جاتا ہے لیکن کچھ لوگ بجٹ کم ہونے کی صورت میں یہ کام کسی تجربے کار کنٹریکٹر سے بھی کروالیتے ہیں۔ 

تعمیراتی کام کے آغاز سے قبل اپنے گردونواح میں نظر دوڑائیں اور دیکھیں کہ حال ہی میں یا کچھ عرصہ قبل کون سےرہائشی منصوبے تعمیر یا تعمیرِ نو کے مرحلے سے گزرے ہیں جو تکمیل کے بعد مثالی پروجیکٹ سمجھے جاتے ہیں۔ ان کو تعمیر کرنے والے متعلقہ کنٹریکٹرز کے بارے میں دریافت کریں اور ان سے ملاقات کریں۔ آپ اپنے حلقہ احباب اور سماجی رابطوں کی ویب سائٹس پر دوستوں کو بھی مطلع کریں کہ آپ تعمیر اتی کام کے لیےکسی بااعتماد اور تجربہ کار کنٹریکٹر کی تلاش میں ہیں۔

کنٹریکٹر درحقیقت ایک تعمیراتی منیجر ہوتا ہے، جسے عموماً پروجیکٹ کے معمار (آرکیٹیکٹ) یا انجینئر کے مشورے سے کام پر رکھا جاتا ہے۔ وہ تعمیراتی منصوبے کو مکمل کرنے کے دوران تمام امور کی نگرانی کا ذمہ دار ہوتا ہے۔ یہ انتہائی اہم ہے کہ تعمیراتی کنٹریکٹر کا درست انتخاب کیا جائے۔ بظاہر کنٹریکٹر کی تلاش کا کام آسان لگتا ہے مگر یہ ایک دشوار عمل ہے کیونکہ آپ نے اس کے کام کو پَرکھنا ہوتا ہے اور اس کے گزشتہ کاموں کو دیکھ کر اس کوکام دینے یا نہ دینے کا فیصلہ کرنا ہوتا ہے۔ 

ایک کنٹریکٹر ہی آپ کے سرمائے اور وسائل کا درست استعمال کرتا ہے لیکن اگر وہ ناتجربہ کار یا کام کا کچا ہوا تو تعمیراتی نقطہ نظر سے آپ کے لیے پریشانی کا سبب بنے گا۔ تعمیراتی کنٹریکٹر کے انتخاب کے حوالے سے ہمارے آج کے مضمون میں آپ کے لیے رہنمائی فراہم کی جارہی ہے۔

کنٹریکٹر سے انٹرویو

مکان کی تعمیر یا تعمیرِ نو ایک ایسا عمل ہے، جو ہر روز نہیں کیا جاتا۔ آپ یقیناً ایک ایسے کنٹریکٹر کو کام دینا چاہیں گے جو اپنے کام میں ماہر ہو، مالی طور پرمستحکم ہو اور اس کے پاس اچھا کام کرنے والے سب کنٹریکٹرز کی ایک ٹیم موجودہو۔ کسی ایک کنٹریکٹر پر اکتفا نہ کیجیے بلکہ اپنے اردگرد دیکھیں کہ دوسرے کنٹریکٹرز آپ کو کیا بہتر آفرز دے سکتے ہیں۔ کسی ایک کنٹریکٹر کی بتائی ہوئی رقم یا خیالات پر آپ اسے تعمیراتی کام کا ٹھیکہ دینے کا فیصلہ نہ کریں۔ کوشش کریں کہ کوئی ایسا کنٹریکٹر ملے جائے جو کم بجٹ میں آپ کو اچھی آفر دے۔ مختلف کنٹریکٹرز سے با ت چیت کرکے ان کی رائے جانیں۔ 

ان کے تجربے، کام اور قیمت کا اندازہ کرنے کے لیے ان کے مکمل کردہ پروجیکٹس دیکھنے کی کوشش کریں۔ انٹرویو کے دوران آپ کنٹریکٹرز سے ریفرنسز، لائسنس، شیڈول اور قیمت سمیت تمام چیزوں کے متعلق معلومات حاصل کرسکتے ہیں، اس طرح آپ اس بات کو یقینی بناسکتے ہیں کہ آپ جس کنٹریکٹر کو منتخب کرنے کے بارے میں سوچ رہے ہیں وہ آپ کے مجوزہ پراجیکٹ کو پایہ تکمیل کو پہچانے کے قابل بھی ہے یا نہیں۔ آپ کا حتمی فیصلہ کسی تجربے کار کنٹریکٹر کے حق میں آنا چاہیے کیونکہ تجربے کا کوئی مول نہیں۔ تمام تر معلومات اور سوالات ایک بہترین تعمیراتی کنٹریکٹر کے انتخاب میں خاصے مددگار ثابت ہوں گے۔

کنٹریکٹر سےطے کردہ بجٹ

ایک مثالی کنٹریکٹر اپنا معاوضہ (طے کردہ بجٹ) عموماً تین حصوں میں تقسیم کرتا ہے؛1۔ مزدوروں کیلئے ایک تہائی حصہ 2۔ تعمیراتی مواد کیلئے ایک تہائی حصہ 3۔ منافع اور متفرق اخراجات کیلئے ایک تہائی حصہ ۔ عام طور سے کنٹریکٹر ہر چیز کی قیمت میں اضافے کا بتا کر آپ سے زیادہ پیسے بٹورنے کی کوشش کرتا ہے، لہٰذا مارکیٹ کا سروے کرکے اس حوالے سے معلومات حاصل کریں۔ 

اس طرح آپ اس بات کو یقینی بناسکیں گے کہ کنٹریکٹر آپ کو تعمیراتی سامان کی اصل قیمت کے مطابق بجٹ سے آگاہ کررہا ہے یا نہیں۔ اس مسئلے کے حل کیلئے آپ کنٹریکٹر کا بجٹ مختص کرنے کے بعد یا اس سے قبل مارکیٹ جائیں، کچھ چیزیں اگر خود بھی خریدی جائیں تو کوئی مضائقہ نہیں، کوشش کریں کہ شروع سے ہی یہ اصول قائم کرلیا جائے۔

کنٹریکٹ اور رقم کی ادائیگی

پیشہ ور اور تجربےکار کنٹریکٹر کو حتمی پیشکش اور اس سے معاہدہ کسی بھی منصوبے کے لیے اہمیت رکھتا ہے۔ اس کے ذریعے یہ طے پاتا ہے کہ آپ نے کتنی رقم ادا کرنی ہے۔ اس دوران ذیل میں درج دو باتوں کا خیال رکھنا ضروری ہے۔

آئٹمائزڈ بِڈ: یہ بولی ظاہر کرتی ہے کہ تعمیراتی پروجیکٹ کی مجموعی رقم میں مواد، مزدوری اور سامان کی لاگت کتنی ہے۔ یہ آپ کے دستیاب بجٹ کا 10سے15فیصد بھی ہوسکتی ہے ۔

کنٹریکٹ: یہ ایک تحریر ی دستاویز ہے، جس میں آپ کنٹریکٹر سےمکان کی تعمیر یا تعمیرِنو کے حوالے سےٹائم فریم اور شیڈول متعین کرواتے ہیں، اس میں کمپنیز سے رابطہ اورانشورنس کی تفصیلات بھی درج کی جاتی ہیں، تعمیر میں حصہ لینے والے مزدور وں کے نام، استعمال میں آنے والا سامان اور ادائیگی کا طریقہ کار بھی لکھا جاتا ہے۔