احسان ﷲ احسان کے نام سے منسوب جعلی ٹوئٹر اکاؤنٹ معطل

17 فروری ، 2021

احسان اللہ احسان کا جعلی ٹوئٹر اکاؤنٹ معطل

سوشل میڈیا سائٹ ٹوئٹر پر کالعدم تحریک طالبان پاکستان کے سابق ترجمان احسان ﷲ احسان کے نام سے منسوب جعلی ٹوئٹر اکاؤنٹ سے ملالہ کو دھمکیاں دیے جانے کے بعد اکاؤنٹ معطل کردیا گیا ہے۔

اب اگر مذکورہ اکاؤنٹ کو کھولا جائے تو اکاؤنٹ معطلی کا پیغام سامنے آتا ہے اور اکاؤنٹ سے تمام تر ٹوئٹس بھی ڈیلیٹ کردیے گئے ہیں۔

یہ بھی پڑھیے

خیال رہے کہ گزشتہ روز جعلی اکاؤنٹ سے ملالہ یوسفزئی کو وطن واپسی پر سنگین نتائج کی دھمکی دی گئی تھیں، ٹوئٹر پر دھمکی آمیز پیغام موصول ہونے کے بعد ملالہ یوسفزئی نے ٹی ٹی پی کے سابق ترجمان احسان ﷲ احسان کے فرار ہونے سے متعلق سوال اٹھایا تھا۔

جعلی ٹوئٹ کے جواب میں ملالہ یوسفزئی نے لکھا تھا کہ ’یہ تحریک طالبان پاکستان کے سابق ترجمان ہیں جو میرے اوپر اور دوسرے معصوم لوگوں پر حملے کی ذمہ داری قبول کرتے ہیں۔ اب وہ سوشل میڈیا پر لوگوں کو دھمکی دے رہے ہیں۔‘

دوسری جانب وزیراعظم عمران خان کے ڈیجیٹل میڈیا کے حوالے سے فوکل پرسن ڈاکٹر ارسلان خالد نے ملالہ کی ٹوئٹ کے جواب میں کہا ہے کہ احسان ﷲ احسان سے منسوب کیا جانے والا اکاؤنٹ جعلی ہے۔

انہوں نے اپنے ٹوئٹ میں لکھا کہ ’میں نے یہ جعلی اکاؤنٹ حکام اور ٹوئٹر کو بھجوا دیا ہے کیونکہ جعلی اکاؤنٹس استعمال کرنے اور نفرت پھیلانے والے ایسے شرپسندوں کو کسی بھی سوشل میڈیا پلیٹ فارم پر موجود ہونے کی اجازت نہیں ہونی چاہیے۔‘

تازہ ترین