فرمان الہی
نماز کے اوقات
لاہور(نمائندگان جنگ )سابق وزیر اعظم یوسف رضا گیلانی نے گذشتہ روزاحتساب عدالت میں ن لیگ کے رہنما شہباز شریف کی پیشی کے موقع پر ان سے ملاقات کی اور سینیٹ انتخابات پرمشاورت کی، زرداری اوربلاول کاخصوصی پیغام پہنچایا،سینیٹ انتخابات میں حمایت کی باضابطہ درخواست کی۔
اس موقع پر دونوں رہنمائوں کے درمیان ضمنی انتخابات کے نتائج سمیت ملک کی مجموعی صورتحال اور آئندہ کی حکمت عملی بارے بھی تبادلہ خیال کیا گیا۔ اس موقع پر پنجاب اسمبلی میں قائد حزب اختلاف حمزہ شہباز ، سردار ایاز صادق ،مریم اورنگزیب اور عطا اللہ تارڑ سمیت دیگر بھی موجود تھے ۔
ملاقات کے بعد میڈیا سے گفتگو کرتے ہوئے یوسف رضا گیلانی نے کہا کہ پارلیمنٹ کی بالا دستی کیلئے شہباز شریف اور حمزہ شہباز سے ملاقات کی ۔ سینیٹ انتخاب میں بطور امیدوار حمایت کرنے پر مسلم لیگ (ن) او رپی ڈی ایم کا شکرگزار ہوں ۔
انہوں نے کہا کہ ہم نے پارلیمنٹ کو عزت دی اورہمیشہ اس کی بالا دستی کے لیے کام کیا، جب وزیر اعظم تھا تو تصادم کی نوبت نہیں آنے دی ۔
اس سوال کہ کیا آپ کی نشست پر کوئی سرپرائز ہو گاکا جواب دیتے ہوئے یوسف رضا گیلانی نے کہا کہ سرپرائز تو ہو چکا،پہلے مجھے نااہل کرانا چاہا پھر میں اہل ہوا،ہم ہارس ٹریڈنگ کی مذمت کرتے ہیں ، حکومت آرڈیننس کے ذریعے جس طرح کی ترمیم کرنا چاہتی ہے وہ سب کے سامنے ہے ۔
انہوں نے کہا کہ میری اختر مینگل اور فضل الرحمان سے بھی ملاقات ہوئی ہے اور ہم سینیٹ کے انتخا بات میں بھر پور مقابلہ کریں گے،پارلیمنٹ ہی سپریم ادارہ ہے ،۔
