آپ آف لائن ہیں
جمعہ3؍رمضان المبارک 1442ھ 16؍اپریل2021ء
  • بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن
Jang Group



پاکستان کرکٹ بورڈ (پی سی بی) نے پاکستان سپرلیگ (پی ایس ایل) سیزن 6 کو غیر معینہ مدت کیلئے ملتوی کردیا ہے۔

کورونا وائرس کے بڑھتے کیسز کے باعث پی ایس ایل کا چھٹا ایڈیشن ملتوی کیا گیا ہے۔

پاکستان کرکٹ بورڈ کے چیف ایگزیکٹو وسیم خان پی ایس ایل 6 کے حوالے سے 3 بجے پریس کانفرنس کریں گے۔

ذرائع کرکٹ بورڈ کے مطابق پی ایس ایل کے چھٹے ایڈیشن کے دوران 7 افراد کووڈ پازیٹو نکلے تھےجن میں 6 کھلاڑی اور ایک آفیشل شامل ہیں۔

پی سی بی اور ٹیموں کے مالکان کے درمیان منعقدہ ورچوئل میٹنگ میں آج لیگ ملتوی کرنے کا فیصلہ کیا گیا۔

پی سی بی فوری طور پر تمام ٹیموں کی پی سی آر ٹیسٹنگ کے لیے اقدامات کرے گا، بورڈ تمام ٹیموں کی کورونا ویکسینیشن اور آئسولیشن سہولیات کےاقدامات بھی کرے گا۔

پاکستان سپر لیگ کے چھٹے ایڈیشن کا آغاز 20 فروری سے ہوا تھا، ایونٹ میں اب تک 14 میچز کھیلے گئے جبکہ 20 میچز باقی تھے جنہیں اب ملتوی کردیا گیا ہے۔

پی ایس ایل 6 کے ملتوی ہونے پر کرکٹ ایکسپرٹ سکندر بخت نے غم و غصے کا اظہار کرتے ہوئے کہا کہ اسکواڈ میں شامل افراد نے کورونا پروٹوکولز پر سختیاں نہیں کیں۔

انہوں نے کہا کہ ایونٹ ملتوی ہوا ہم سب کا نقصان ہوا، امیج خراب ہو رہا ہے۔

ایونٹ ملتوی ہونے پر اسلام آباد یونائیٹڈ کے کھلاڑی حسن علی نے سوشل میڈیا پر کہا کہ ہمارے پی ایس ایل کو کسی کی نظر لگ گئی۔

واضح رہے کہ پی ایس ایل 6 میں شریک 7 افراد کورونا وائرس کا شکار ہوگئے تھے جن میں 6 کھلاڑی اور ایک آفیشل شامل تھے۔

اس کے علاوہ کراچی کنگز کے غیر ملکی آل راونڈر ڈین کرسٹین نے لیگ سے دستبرداری کا فیصلہ کرلیا تھا جبکہ وسیم اکرم نے بھی لیگ چھوڑنے کیلئے مشاورت کرلی تھی۔

کھیلوں کی خبریں سے مزید