فنڈنگ کیس کا فیصلہ وقت پر ہوتا تو یہ قیادت نہ ہوتی: اکبر ایس بابر

30 مارچ ، 2021

پاکستان تحریکِ انصاف کے بانی رہنما اکبر ایس بابر کہتے ہیں کہ اگر پاکستان تحریکِ انصاف (‎پی ٹی آئی) کے خلاف غیر ملکی فنڈنگ کیس کا فیصلہ وقت پر ہوجاتا تو آج پاکستان میں یہ قیادت نہیں ہوتی۔

الیکشن کمیشن آف پاکستان میں پاکستان تحریکِ انصاف (‎پی ٹی آئی) کے خلاف غیر ملکی فنڈنگ کے ریکارڈ کی فراہمی سے متعلق اپنی درخواست پر سماعت کے بعد باہر میڈیا سے گفتگو کرتے ہوئے اکبر ایس بابر نے کہا کہ آج وہ قیادت سامنے ہوتی کہ پاکستان ترقی کی راہ پر ہوتا۔

انہوں نے کہا کہ ہماری آزادی اور خود مختاری خطرے میں ڈال دی گئی ہے، اسٹیٹ بینک حوالے کر کے خزانے کی چابی حوالے کر دی گئی ہے، سی پیک کو داؤ پر لگا دیا گیا ہے۔

پی ٹی آئی کے خلاف غیر ملکی فنڈنگ کیس سے متعلق اکبر ایس بابر کا کہنا ہے کہ سماعت کے دوران میرے وکیل نے دلائل دیئے کہ ڈاکومنٹس کو خفیہ رکھنا غیر قانونی ہے۔

انہوں نے کہا کہ پچھلی سماعت میں اسکروٹنی کمیٹی کو رپورٹ جمع کرانے کا کہا گیا تھا، اسکروٹنی کمیٹی کی رپورٹ آئی ہے، ہم نے اس کا مطالعہ نہیں کیا ہے۔

پاکستان تحریکِ انصاف کے بانی رہنما نے کہا کہ 6 سال ہو گئے ہیں، مدعی سے ڈاکومنٹس خفیہ رکھے جا رہے ہیں، اسکروٹنی کمیٹی سے متعلق میری درخواست سنی گئی۔

یہ بھی پڑھیے

انہوں نے کہا کہ اسکروٹنی کمیٹی میں پیش شواہد خفیہ رکھنا غیر قانونی ہے، اسکروٹنی کمیٹی کا تحریری جواب آیا ہے، اس کا جائزہ لیں گے۔

اکبر ایس بابر کا مزید کہنا ہے کہ الیکشن کمیشن نے اگلے مہینے کی 6 تاریخ مقرر کی ہے۔

انہوں نے یہ بھی کہا ہے کہ اسکروٹنی کمیٹی نے لکھا ہے کہ پی ٹی آئی کے اعتراض پر مدعی کو کاغذات نہیں دیئے۔

تازہ ترین