ٹیکنالوجی نے وکٹ کیپر کی بےایمانی پکڑ لی

12 اپریل ، 2021

انگلینڈ کے کاؤنٹی چیمپئن شپ میچ کے دوران بیٹسمین کو آؤٹ کرنے کے لئے دونوں امپائرز کی نظروں سے بچ جانے والے وکٹ کیپر کی بےایمانی کو کیمروں اور ٹیکنالوجی نے پکڑ لیا۔

لیسٹرشائر اور ہیمپشائر کے درمیان جاری میچ میں اس وقت تنازع دیکھنے میں آیا جب ہیمپشائر کے وکٹ کیپر نے مخالف ٹیم کے بیٹسمین کو’ اسٹمپ آؤٹ‘ کر کے زوردار اپیل کی۔ وکٹ کیپر اور دیگر فیلڈرز کے اصرار پر اسکوائر لیگ امپائر نے بیٹسمین کو آؤٹ قرار دے دیا۔

آؤٹ قرار دیئے جانے کے بعد ری پلے میں وکٹ کیپر کی بےایمانی کا بھانڈا پھوٹ گیا۔ جس نے الٹے ہاتھ سے اسٹمپ کیا جبکہ بال اسکے سیدھے ہاتھ میں تھی۔

واقعے کے کچھ ہی دیر بعد لیسٹرشائر کے ہیڈکوچ نے میچ ریفری سے بات کر کے معاملے پر مایوسی کا اظہار کیا جبکہ اس معاملے کو انگلینڈ کرکٹ بورڈ کے ساتھ بھی اٹھا دیا گیا ہے۔

انگلینڈ کرکٹ ٹیم کے سابق کپتان مائیکل وان نے اس بےایمانی کو بہت ہی خراب قرار دیتے ہوئے لکھا کہ امید ہے وکٹ کیپر اس سے سبق حاصل کرے گا کیونکہ ان دنوں اس طرح کے واقعات سے بچنے کا کوئی امکان نہیں کیونکہ کاؤنٹی کے تمام میچز آن لائن دکھائےجارہے ہیں۔

واضح رہے کہ کرکٹ قوانین کے مطابق وکٹ کیپر کو بیٹسمین کو ’اسٹمپ‘ آؤٹ کرنے کے لئے وہی ہاتھ وکٹ پر مارنا ہوتا ہے جس ہاتھ میں اس نے بال پکڑی ہو۔

تازہ ترین