ٹی ایل پی کو ختم کرنے کے لیے سپریم کورٹ جارہے ہیں، شیخ رشید

وزیرداخلہ شیخ رشید احمد  کا کہنا ہے کہ تحریک لبیک پاکستان (ٹی ایل پی) کو ختم کرنے کے لیے کل سپریم کورٹ سے بھی رجوع کررہے ہیں۔

اسلام آباد میں پریس کانفرنس کرتے ہوئے شیخ رشید نے کہا کہ  وزیراعظم نے مجھے اور نورالحق قادری کو ٹی ایل پی سے  متعلق تفصیلی ہدایات دیں۔

 شیخ رشید نے کہا کہ پولیس اہلکاروں نے جانوں کا نذرانہ دے کر امن کو یقینی بنایا، ہم نے پوری کوشش کی بات چیت سے مسئلے حل ہوں۔

وزیر داخلہ نے کہا کہ ان کے ارادے خوفناک تھے وہ اپنے ایجنڈے سے پیچھے ہٹنا نہیں چاہتے تھے، ٹی ایل پی پر پابندی کےنوٹفکیشن کے لیے ضروری کارروائی جاری ہے۔

 شیخ رشید نے کہا کہ 580 پولیس والے زخمی ہیں، سب کو سلام پیش کرتا ہوں، پنجاب پولیس اور رینجرز کو سلام پیش کرتے ہیں۔