اسلام آباد: یومِ شہدائے پولیس کی تقریب

وفاقی دارالحکومت اسلام آباد میں یومِ شہدائے پولیس کی تقریب کا انعقاد کیا گیا جہاں آئی جی اسلام آباد قاضی جمیل الرحمان نے سینئر افسران کے ہمراہ یادگار شہداء پر پھولوں کی چادر چڑھائی۔

یادگارِ شہداء پر پولیس کے چاک و چوبند دستے نے سلامی پیش کی جبکہ اسلام آباد پولیس سمیت پورے ملک کے شہداء کے درجات کی بلندی کے لیے فاتحہ خوانی کی گئی۔

اس موقع پر آئی جی قاضی جمیل الرحمان نے کہا کہ اسلام آباد پولیس کے 53 شہداء نے فرض کی ادائیگی کے ساتھ اس مٹی کا حق ادا کیا۔

اسلام آباد میں شہدائے پولیس کو خراجِ عقیدت پیش کرنے کیلئے تقریب

پولیس فورس کے شہدا کو خراج عقیدت پیش کرنے کے لیے اسلام آباد کے ڈی چوک پر تقریب کا انعقاد کیا گیا۔ تقریب میں پولیس کے شہدا کی یاد میں شمعیں روشن کی گئیں۔

آئی جی قاضی جمیل الرحمان نے کہا کہ ہم شہداء کے خاندانوں کو کبھی نہیں بھولیں گے، بیوہ، بچوں کے ساتھ کھڑے ہیں۔

اُن کا مزید کہنا تھا کہ ہم بحیثیت قوم اپنے شہداء کی لازوال قربانیوں کے مقروض ہیں۔