چیف جسٹس کیخلاف نازیبا زبان، پی پی وزراء سمیت 15 ارکان طلب

کراچی (ٹی وی رپورٹ) وفاقی تحقیقاتی ایجنسی (ایف آئی اے) کے سائبر کرائم سرکل نے چیف جسٹس پاکستان جسٹس گلزار احمد کیخلاف نازیبا زبان کے استعمال پر سندھ حکومت کے 2 وزراء اور پیپلزپارٹی کے 8ارکان اسمبلی سمیت 15 رہنماؤں کو طلب کرلیا۔ایف آئی اے حکام نے بتایا کہ پی پی کے ارکان اسمبلی کے علاوہ 7 مزید عہدیداروں کو بھی طلب کیا گیا ہے۔ تفصیلات کے مطابق چیف جسٹس آف پاکستان کیخلاف نازیبا زبان کے استعمال کے معاملے پر ایف آئی اے سائبر سرکل کی تحقیقات کے بعد پیپلز پارٹی کے اراکین اسمبلی سمیت 15 رہنماؤں کو طلبی کا نوٹس جاری کیا گیا۔سینئر حکام نے بتایا کہ صوبائی وزیر اطلاعات ناصر حسین شاہ، صوبائی وزیر تعلیم سعید غنی، ارکان اسمبلی شہلا رضا، ناز بلوچ، نفیسہ شاہ، شاہدہ رحمانی، قادر خان مندوخیل اور قادر پٹیل کو بھی ایف آئی اے سائبر کرائم سرکل طلب کیا گیا ہے جبکہ ان تمام رہنماؤں کو 12 اور 13 اگست کو طلب کیا گیا ہے۔حکام کے مطابق نازیبا تقریر کے معاملے پر گرفتار ملزم کے موبائل فون سے ان افراد کے رابطے کا ریکارڈ ملا ہے۔ایف آئی اے حکام نے مزید بتایا کہ پی پی کے ارکان اسمبلی کے علاوہ 7 مزید عہدیداروں کو بھی طلب کیا گیا ہے۔