فرمان الہی
نماز کے اوقات
کشمیری رہنما غلام نبی فائی کا کہنا ہے کہ وہ 25 ستمبر کو بھارتی وزیرِ اعظم نریندر مودی کی اقوامِ متحدہ میں تقریر کے وقت احتجاجی مظاہرہ کریں گے۔
یہ بات کشمیری رہنما غلام نبی فائی نے بھارتی حکومت کی جانب سے عائد نظر بندی کے دوران سینئر کشمیری و حریت رہنما سید علی شاہ گیلانی کے انتقال پر مذمتی بیان میں کہی ہے۔
انہوں نے یہ بھی کہا کہ سید علی گیلانی کو خراجِ عقیدت پیش کرنے کے لیے ویب نار منعقد کیا جائے گا۔
دوسری جانب سینئر کشمیری و حریت رہنما سید علی شاہ گیلانی کے انتقال پر پاکستانی و کشمیری کمیونٹی کی جانب سے سوگ منایا جا رہا ہے۔
پاکستانی و کشمیری کمیونٹی نے سید علی گیلانی کی جلد تدفین اور لواحقین پر مودی سرکاری کے دباء کی شدید مذمت کی ہے۔
امریکا و کینیڈا کی پاکستانی و کشمیری کمیونٹی نے کشمیری رہنماؤں اور عوام پر بھارتی جبر کی بھی شدید مذمت کی ہے۔
واضح رہے کہ سینئر کشمیری حریت رہنما سید علی گیلانی گزشتہ روز بھارتی قید میں انتقال کر گئے۔
انتقال کے وقت سید علی گیلانی کی عمر 92 سال تھی اور 12 برس سے انہیں بھارتی فوج نے گھر میں نظر بند کر رکھا تھا۔
سید علی گیلانی کشمیر پر بھارتی قبضے کے بڑے مخالف اور کشمیریوں کے حقِ خودارادیت کے علم بردار تھے۔
پاکستان میں سید علی گیلانی کی وفات پر قومی پرچم سرنگوں رہے گا اور ان کی یاد میں ایک دن سرکاری سطح پر سوگ منایا جائے گا۔
صدرِ مملکت ڈاکٹر عارف علوی، وزیرِ اعظم عمران خان، آرمی چیف جنرل قمر جاوید باجوہ، امیرِ جماعتِ اسلامی سراج الحق، وفاقی وزیرِ اطلاعات فواد چوہدری، وزیرِ خارجہ شاہ محمود قریشی سمیت حریت رہنماؤں اور پاکستان کے دیگر رہنماؤں نے سید علی گیلانی کے انتقال پر تعزیت کا اظہار کیا ہے۔
