فرمان الہی
نماز کے اوقات
ایران میں فردو، نطنز اور اصفہان کی جوہری تنصیبات پر امریکی حملے کے بعد ان مقامات کی سیٹلائٹ تصاویر سامنے آگئیں۔
غیر ملکی خبررساں ایجنسی کی جانب سے فراہم کردہ تصاویر میں فردو، نطنز اور اصفہان کی جوہری تنصیبات پر ہونے والی تباہی دیکھی جاسکتی ہے۔
امریکی میڈیا کے مطابق فردو جوہری سائٹ پر حملے میں 6 بی ٹو بم بار طیاروں نے 12 بنکر بسٹر بم گرائے، دیگر ایرانی جوہری سائٹس پر حملے میں 30 ٹوماہاک میزائل استعمال کیے گئے۔
خبر رساں ایجنسی کے جانب سے جاری ہونے والی فردو کی جوہری مرکز کی تصاویر میں 3 مقامات پر امریکی حملے کے آثار دیکھے جاسکتے ہیں۔ بنکر بسٹر بموں کے نتیجے میں 2 گڑھے اور جوہری ری ایکٹر کے تحفظ کے لیے بنائی گئی فضائی دفاعی سائٹ کو نقصان پہنچا ہے۔
ایران کی نطنز جوہری تنصیب پر اتوار کو ہونے والے امریکی حملے کے بعد سامنے آنے والی سیٹلائٹ تصاویر میں گڑھا دکھائی دے رہا ہے۔
خبر ایجنسی کا کہنا ہے کہ پلانیٹ لیبز پی بی سی اور میکسر ٹیکنالوجیز کی طرف سے لی گئی تصاویر میں تقریباً 5 میٹر (16 فٹ) کا گڑھا دیکھا جا سکتا ہے۔
انہوں نے کہا کہ گڑھا براہ راست سائٹ کے زیر زمین حصے پر پڑا ہے، جس میں سینٹری فیوج ہال بھی شامل ہیں۔
میڈیا رپورٹس کے مطابق امریکی حملے میں اصفہان کمپلیکس میں زیرِ زمین سرنگوں کے داخلی راستے بھی نشانہ بنے، جس کے نتیجے میں افزودہ یورینیئم کے ذخیرے والی سرنگوں کے داخلی راستے متاثر ہوئے ہیں۔
خیال رہے کہ ایران کی جوہری تنصیبات پر حملہ کر کے امریکا بھی اسرائیل کی جنگ میں شامل ہو گیا ہے۔ امریکا نے فردو، نطنز اور اصفہان جوہری تنصیبات پر بمباری کی۔
ایرانی ایٹمی توانائی ادارے نے فردو، نطنز اور اصفہان جوہری سائٹس پر حملوں کی تصدیق کردی۔
اقوام متحدہ کے جوہری نگراں ادارے آئی اے ای اے کے مطابق امریکی حملے کے بعد ایران کے جوہری تنصیبات پر تابکاری میں اضافے کی اطلاعات موصول نہیں ہوئیں۔
