فرمان الہی
نماز کے اوقات
پاکستان کے نامور اداکار اور کامیڈی کے بے تاج بادشاہ عمر شریف کی نماز جنازہ پڑھانے کی درخواست عالم دین مفتی تقی عثمانی نے قبول کرلی ہے۔
اداکار عمر شریف کے انتقال کے بعد ان کی اہلیہ زرین غزل کا ویڈیو پیغام سامنے آیا جس میں انہوں نے پاکستان اور بھارت سے ملنے والی دعاؤں پر سب کا شکریہ ادا کیا اور بتایا کہ مرحوم عمر شریف کی نمازِ جنازہ مفتی تقی عثمانی پڑھائیں گے۔
اہلیہ عمر شریف نے تمام مداحوں سے کہا کہ آپ کی دعاؤں کے باعث عمر یہاں تک پہنچے اور آگے بھی انہیں آپ لوگوں کی دعاؤں کی ضرورت ہے، اللہ ان کی آگے کی منزل آسان کرے۔
انہوں نے وزیراعظم پاکستان عمران خان اور سندھ حکومت کا شکریہ ادا کرتے ہوئے کہا کہ ان لوگوں نے ہماری اس مشکل وقت میں بہت مدد کی۔
زرین غزل نے ڈاکٹر طارق شہاب کا بھی شکریہ ادا کیا اور کہا کہ انہوں نے عمر شریف کے لیے امریکا میں اسپتال کا انتظام کیا تھا۔
عمر شریف کی اہلیہ کا کہنا ہے کہ عمر کی یہ خواہش تھی کہ انہیں عبداللہ شاہ غازی کے احاطے میں سپرد خاک کیا جائے، میں شکریہ ادا کرتی ہوں کہ سندھ حکومت نے ان کی اس خواہش کو پورا کیا۔
زرین غزل نے کہا کہ میں نے مولانا تقی عثمانی صاحب سے درخواست کی ہے کہ وہ عمر شریف کی نماز جنازہ پڑھائیں اور انہوں نے اسے قبول بھی کر لیا ہے۔
