نسلہ ٹاور پر جس نے غلط کیا اس کے خلاف کارروائی ہونی چاہیے، ناصر شاہ

November 26, 2021

وزیر بلدیات سندھ ناصر حسین شاہ کا کہنا ہے کہ نسلہ ٹاور اہم مسئلہ ہے، مگر اس وقت کی شہری حکومت کے دور میں پلاٹوں کو کمرشلائز کیا گیا تھا، جس نے بھی کوئی غلط کام کیا ہے اس کے خلاف کارروائی ہونی چاہیے۔

سندھ اسمبلی کے باہر میڈیا سے گفتگو کرتے ہوئے ناصر شاہ نے کہا کہ بلدیاتی نظام میں اچھی ترامیم کی گئی ہیں، اپوزیشن کا احتجاج بلا جواز تھا، اپوزیشن کی تجاویز ہمارے پاس آئی تھیں جنہیں ہم نے شامل بھی کیا۔

ناصر شاہ نے کہا کہ کراچی میں ٹاؤن کا نظام لارہے ہیں، ٹاؤنز کی تعداد میں اضافہ کیا گیا ہے، ٹاؤنز نظام سے متعلق اپوزیشن نے بھی تجویز دی تھی، شہری علاقوں میں ٹاؤن سسٹم اور میٹروپولیٹن کارپوریشن ہوگی، بلدیاتی ادارے با اختیار ہوں گے، میونسپل سروسز بلدیاتی اداروں کا کام ہوگا۔

صوبائی وزیر نے کہا کہ کراچی کے شہریوں کو فیصلہ کرنا ہے کہ کس کو ووٹ دینا ہے، پر امید ہیں بلاول بھٹو کا ترقی، فلاحی کا وژن مدنظر رکھتے ہوئے پیپلز پارٹی کو کامیاب کریں گے۔

ناصر شاہ نے کہا کہ موجودہ وفاقی حکومت پاکستانیوں کا معاشی قتل کررہی ہے، وفاقی پالیسیوں کی وجہ سے خودکشی کے واقعات ہورہے ہیں۔