سب کو آزما لیا، ظلم کے خلاف ہمیں خود احتجاج کرنا ہوگا، کنور نوید جمیل

December 03, 2021

کراچی( اسٹاف رپورٹر) ڈپٹی کنوینر ایم کیو ایم پاکستان و پارلیمانی لیڈر سندھ اسمبلی کنور نوید جمیل نے ضلع وسطی میں احتجاجی مظاہرے سے خطاب کرتے ہوئے کہا ہےکہ میئر ڈپٹی مئیر کا انتخاب خفیہ رائے شماری کے ذریعے اس لئے کرایا جائے گا تاکہ پیپلز پارٹی پیسوں سے ووٹوں کی خرید و فروخت کر سکے ، ہم نے بڑے اداروں سمیت سب کو آزما لیا ،کراچی پر ہونے والے ظلم کے خلاف ہمیں خود احتجاج کرنا ہوگا، ڈپٹی کنوینر و سابق میئر کراچی وسیم اخترنے خطاب کرتے ہوئے کہا کہ ظالمانہ نظام کے خلاف جدوجہد میں اپنی جانوں کا نذرانہ پیش کریں گے، کراچی کے لوگ بہت بڑی تحریک چلانے کو تیار ہو جائیں، عمران خان کی حکومت کو کراچی کے خلاف زیادتیوں پر ایکشن لینا ہوگاورنہ ایسا نہ ہو مہنگائی سے تنگ عوام آئندہ انکو اپنے حلقوں میں بھی گھسنے نہیں دیں گے، کنور نوید جمیل نے مزید کہا کہ پاکستان بنانے والوں کو سندھ میں پیپلز پارٹی کی متعصب قیادت کے نرغے میں کر دیا ہے نہ کوئی عدالت نہ تو کوئی ادارہ نہ وفاقی حکومت داد رسی کو آتی ہے ہر ایک اختیار شہری سندھ کے عوام سے چھین لیا ہے،جعلی ڈومیسائل بنا کر سندھ کے شہری علاقوں کو نوکریوں سے محروم کیاجس پرایم کیو ایم پاکستان کی پٹیشن آج بھی عدالتوں میں سماعت کی منتظر ہیں، نیا بلدیاتی قانون تاریخ کا بد ترین کالا قانون ہے۔