سانحہ سیالکوٹ پر اسلامی نظریاتی کونسل کا خصوصی اجلاس طلب کرلیا گیا، جس میں واقعے کے اسباب پر غور کیا جائے گا۔
وزیراعظم کے نمائندہ خصوصی طاہر اشرفی کا کہنا ہے کہ اسلامی نظریاتی کونسل کا اجلاس 20 دسمبر کو ہوگا، جس میں سانحہ سیالکوٹ کے اسباب، عوامل پر غور ہوگا۔
معاون خصوصی نے کہا کہ اجلاس میں مختلف شعبوں کے ماہرین کو بھی بلایا جائے گا۔
حافظ طاہر اشرفی کا کہناہے کہ مذہبی قیادت اور کونسل موجودہ ملکی صورتحال سے لا تعلق نہیں رہ سکتی۔
انہوں نے کہا کہ کل علما کی مشترکہ پریس کانفرنس، وزیراعظم کا اعلان اور کور کمانڈر کانفرنس کا اعلامیہ روشن مستقبل کی امید ہے۔
سیالکوٹ واقعے کے 34 مرکزی ملزمان گرفتار ہیں، ڈی پی او
واضح رہے کہ سیالکوٹ میں مشتعل ہجوم کے ہاتھوں سری لنکن فیکٹری منیجر پریانتھا کمارا کے قتل کے کیس سے متعلق ڈی پی او کا کہنا ہے کہ واقعے میں ملوث 34 سے زائد مرکزی ملزمان گرفتار ہیں جنہیں 21 دسمبر کو دہشت گردی عدالت میں دوبارہ پیش کیا جائے گا۔
جیو نیوز سے گفتگو کرتے ہوئے ڈی پی او عمر سعید ملک نے بتایا کہ پریانتھا کمارا کیس کے تین پہلو تھے جن میں امن وامان کی صورتحال، ملزمان کی گرفتاریاں اور تفتیش شامل ہے۔
ڈی پی او نے بتایا کہ سیالکوٹ واقعہ 11 بجکر 5 منٹ پر پیش آیا، پولیس کو اطلاع 11 بجکر 26 منٹ پر ہوئی اور جب اطلاع ملی تو جی ٹی روڈ مکمل بلاک تھا، تمام افسران اور نفری کے ہمراہ جائے وقوع پر پہنچا، اس وقت ہجوم کے ہاتھوں میں پیٹرول کی بوتلیں تھیں۔
عمر سعید ملک نے کہا کہ ہجوم نے پولیس پر بھی حملہ آور ہونے کی کوشش کی، تاہم ہم نے تین سے چار گھنٹوں میں 100 سے زائد افراد کو گرفتار کیا۔
ڈی پی او نے مزید کہا کہ صبور بٹ اور امتیاز واقعے کے پہلے مرکزی کردار ہیں، زیادہ تر ملزمان کو لاری اڈہ سے گرفتار کیا گیا ہے۔