ڈراپ ان پچز کا ہونا بہت ضروری ہے، رمیز راجہ

November 29, 2022

چیئرمین پاکستان کرکٹ بورڈ (پی سی بی) رمیز راجہ نے کہا ہے کہ ڈراپ ان پچز کا ہونا بہت ضروری ہے، ہر طرح کی پچز کا انتخاب کیا جا سکتا ہے۔

جیو نیوز سے خصوصی گفتگو کرتے ہوئے رمیز راجہ کا کہنا تھا کہ پچز نئی تھیں جو پچھلے سال سے نسبتاً بہتر تھیں۔

انہوں نے یہ بھی کہا کہ پچز ہمارے قابو میں نہیں ہیں اس لیے ڈراپ ان پچز کے تصور کو ابھی چھوڑا نہیں ہے، تاہم اس پر ہوم ورک کر رہے ہیں۔

چیئرمین پی سی بی نے اعتراف کیا کہ ہماری پچز ابھی بھی اس معیار کی نہیں ہیں جو مخالف ٹیم کو سامنے رکھ کر منتخب کر سکیں۔

رمیز راجہ کا کہنا تھا کہ تمام پچز ایک طرح کی محسوس ہوتی ہیں، میں چاہتا ہوں کہ ہر سینٹر کی پچز الگ الگ محسوس ہوں، ہر سینٹر کی پچز کا اپنا کیریکٹر ہو، ابھی ہم اس سے دور ہیں۔

قائداعظم ٹرافی میں کھلاڑیوں کی کارکردگی پر بات کرتے ہوئے چیئرمین پی سی بی نے کہا کہ نوجوان کرکٹرز کا پرفارم کرنا مثبت پہلو ہے، خاص طور پر ابو ہریرہ نے متاثر کیا، 20 سال کی عمر میں اتنے رنز کرنا ایک خاص بات ہوتی ہے۔

رمیز راجہ نے کہا کہ سسٹم کو ابھی مزید مضبوط بنانے کی ضرورت ہے، سسٹم میں مزید مقابلہ لانا ہوگا۔

فائنل پر تبصرہ کرتے ہوئے رمیز راجہ نے کہا کہ فائنل اچھا ہوا ایک ٹیم نے غلبہ حاصل کیا، 20 وکٹیں لینا بڑی بات ہے۔

ان کا کہنا تھا کہ پنڈی کی پچز اچھی تھیں، قذافی اسٹیڈیم کی پچز اور اچھی بن سکتی ہیں، پچز کو بنے تین چار ماہ ہوئے ہیں، انہیں بہتر ہونے میں وقت لگتا ہے۔