کراچی: رمضان میں مزید نئے روٹس پرالیکٹرک بسیں چلانے کا فیصلہ

March 24, 2023

سندھ حکومت نے کراچی میں ماہ رمضان کے دوران مزید نئے روٹس پر پیپلز الیکٹرک بس سروس چلانے کا فیصلہ کیا ہے۔

وزیر ٹرانسپورٹ سندھ شرجیل میمن کی زیر صدارت پبلک ٹرانسپورٹ پروجیکٹس سے متعلق اجلاس ہوا۔

شرجیل انعام میمن کا کہنا تھا کہ محکمہ ٹرانسپورٹ کے تحت مزید نئی الیکٹرک بسیں لائی جارہی ہیں۔

اجلاس میں پیپلز بس سروس، بی آر ٹی ریڈ لائن، اورنج لائن اور یلو لائن پروجیکٹس کا بھی جائزہ لیا گیا۔

وزیر ٹرانسپورٹ نے کہا کہ ایک ہفتے میں کورنگی میں شہید ذوالفقار علی بھٹو انسٹیٹیوٹ آف کارڈیو ویسکیلولر ڈیزیز اورجوہر چورنگی پر فلائی اوور کے منصوبوں کا افتتاح کیا گیا ہے۔

انہوں نے کہا کہ کراچی کے عوام نے پاکستان پیپلز پارٹی کو بلدیاتی انتخابات میں بھاری مینڈیٹ دیا ہے، ان کی توقعات پر پورا اترنا ہماری ترجیح ہے۔

صوبائی وزیر نے کہا کہ یلیو لائن پروجیکٹ پر جلد کام کا آغاز کرنے جا رہے ہیں، جام صادق پل کا ٹینڈر 2 مئی تک ایوارڈ کر دیا جائے، اس میں تاخیر کسی صورت برداشت نہیں کی جائے گی۔

شرجیل انعام میمن نے کہا کہ بی آر ٹی ریڈ لائن پروجیکٹ کے کنٹریکٹرز کو رواں ہفتہ 400 ملین روپے کی ادائیگیاں کردی ہیں، بی آر ٹی ریڈ لائن کی لاٹ ون اور لاٹ ٹو پر 24 گھنٹے دو شفٹوں میں کام یقینی بنایا جائے۔