کینیڈا میں خالصتان کے حامی سکھوں کے قتل اور ان میں بھارت کے ملوث ہونے پر پشاور میں سکھ برادری نے احتجاجی مظاہرہ کیا۔
سکھ برادری نے سکھ رہنما کے قتل پر پشاور میں گورد وارہ بھائی جوگا سنگھ کے سامنے مظاہرہ کیا۔
سکھ مظاہرین نے بھارت کو ہردیپ سنگھ کے قتل کا ذمہ دار قرار دیتے ہوئے اس کے مخالف نعرے لگائے۔ انہوں نے اقوام متحدہ سے ہردیپ سنگھ کے قتل کی تحقیقات کا مطالبہ کیا۔
سکھ رہنما صاحب سنگھ نے کہا کہ یہ پہلا واقعہ نہیں جس میں بھارت ملوث ہے، کینیڈا کی حکومت کا اقدام قابل تحسین ہے، کینیڈین حکومت نے بھارت کا گھناؤنا چہرہ بے نقاب کردیا۔
احتجاجی مظاہرین سے خطاب کرتے ہوئے منمیت سنگھ نے کہا کہ سکھ کمیونٹی ہردیب سنگھ کے قتل کے خلاف یکجان ہے، ان کی قربانی رائیگاں نہیں جائیگی، کینیڈا کی حکومت نے ان کے قتل میں بھارتی خفیہ ایجنسی را کے ملوث ہونے کا ثبوت دیا ہے۔