بالی ووڈ اداکار اور اداکارہ کترینہ کیف کے شوہر وکی کوشل نے اپنی آئندہ آنے والی فلم ڈنکی کے ساتھی اداکار اور بالی ووڈ سپر اسٹار شاہ رخ خان کی تعریف کردی۔
ان کا کہنا ہے کہ انہیں اندازہ ہوا کہ وہ ہر چیز میں سو فیصد پرفارم کرتے ہیں جبکہ میں اس عمر میں بھی ان سے پیچھے ہوں وہ کچھ اور ہی چیز ہیں۔
وکی کوشل نے ان خیالات کا اظہار بھارتی ٹیلی ویژن کے شو، کافی ود کرن کے آٹھویں سیشن میں میزبان کرن جوہر سے گفتگو کے دوران کیا جہاں ان کے ساتھ دوسری مہمان کیارا ایڈوانی تھیں۔
گزشتہ ہفتے ریلیز ہونے والی فلم سام بہادر میں مرکزی رول کرنے والے وکی کوشل نے کہا کہ شاہ رخ خان نے ڈنکی کی شوٹنگ میں نہ پہنچنے پر معذرت کی اور کہا کہ دہلی کے رش کی وجہ سے شوٹنگ پر انہیں کیو نہ دینے پر شرمندہ ہیں۔
ان کا کہنا تھا کہ وہ اس سین کو دوبارہ شوٹ کریں گے جس پر میں نے انہیں فون کرکے راضی کیا کہ دوبارہ کرنے کی ضرورت نہیں، ہدایتکار راجکمار ہیرانی مطمئن ہیں۔ وکی کوشل کا کہنا تھا کہ وہ شاہ رخ خان کی اس عاجزی سے بہت متاثر ہوئے۔
یاد رہے کہ وکی کوشل کنگ خان کے ساتھ پہلی بار کسی فلم میں کام کر رہے ہیں اسی وجہ سے وہ کافی پرجوش بھی ہیں۔