اسپاٹ فکسنگ،5کرکٹرز کے نام ای سی ایل میں شامل | Daily Jang News
| |
Home Page
اتوار 29 رمضان المبارک 1438ھ 25 جون 2017ء
March 20, 2017 | 03:45 pm
اسپاٹ فکسنگ،5کرکٹرز کے نام ای سی ایل میں شامل

Five Cricketers Name Puts In Ecl

Five Cricketers Name Puts In Ecl
اسپاٹ فکسنگ اسکینڈل میں پانچ مشتبہ کھلاڑیوں محمد عرفان، شاہ زیب حسن ، خالد لطیف ، شرجیل خان اور ناصر جمشید کے نام ای سی ایل میں شامل کردیئے گئے ہیں، نام ای سی ایل میں ڈالنے کی منظوری وزیرداخلہ چودھری نثار کی زیرصدارت اجلاس میں دی گئی۔

ایف آئی اے نے اسپاٹ فکسنگ اسکینڈل کی تحقیقات کے دوران 5 مشتبہ کھلاڑیو ں کے نام ایگزٹ کنٹرول لسٹ میں شامل کرنے کیلئے وزارت داخلہ سے سفارش کی تھی ۔

ذرائع کے مطابق مشتبہ کھلاڑیوں کے نام ای سی ایل میں شامل کرنے کی سفارش ایف آئی اے پنجاب کے ڈائریکٹر ڈاکٹر عثمان اور تفتیشی افسر شاہد حسن کی طرف سے کی گئی تھی اور اس ضمن میں وزار ت داخلہ مراسلہ لکھا تھا۔

ذرائع کا کہنا ہےکہ مذکورہ کھلاڑیوں کے نام مراسلہ تحریر کئے جانے کے 48 گھنٹو ں میں ای سی ایل میں شامل کر لیا گیا ہے ۔

وزیر داخلہ چودھری نثار کا کہنا ہے کہ اسپاٹ فکسنگ میں ملوث کھلاڑیوں کے ساتھ ساتھ بُکیزکے خلاف بھی کارروائی کی جائے۔وزیرداخلہ نےکرکٹ میں جوا اوراس کو فروغ دینے والی تمام ویب سائٹس کوبند کرنے کی ہدایت بھی کی۔

چودھری نثار کا کہنا تھا کہ اسپاٹ فکسنگ معاملے کی ہرپہلوسے شفاف،غیرجانبدارانہ تحقیقات کی جائیں، پاکستان کا نام بدنام کرنے والوں کو قانون کے کٹہرے میں لایا جائے، اسپاٹ فکسنگ میں ملوث شخص کےساتھ کسی قسم کی رعایت نہ برتی جائے۔

واضح رہے کہ پاکستان سپر لیگ ٹو میں پی سی بی نے ابتدائی مرحلے میں دو کھلاڑیوں شرجیل خان اور خالد لطیف کو معطل کر کے وطن واپس بھیج دیا تھا، بعدازاں محمد عرفان اور شاہ زیب حسن کو بھی معطل کردیا گیا تھا۔