ایک دن میں 9 شہر گھومنے کا عالمی ریکارڈ

لندن سے تعلق رکھنے والے ایڈم لیٹون اور ان کے دوست کرس فلیٹچر نے 24 گھنٹوں میں شیڈول ٹرانسپورٹ کے ذریعے سے 9 دارالحکومتوں کی سیر کرکے ورلڈ ریکارڈ اپنے نام کرلیا۔

دونوں نے 25 سے 26 نومبر کے درمیان لندن سے ٹرین میں ایمسٹرڈیم سے اپنے سفر کا آغاز کیا جس کے بعد وہ پیرس اور برسلز تک پہنچے۔

برسلز پہنچنے کے بعد برلن تک کا سفر انہوں نے جہاز سے کیا، برلن پہنچتے ہی ایڈم اور کرس بس سے پراگ کے لیے روانہ ہوئے، پھر انہوں نے دوسری فلائٹ لی اور براٹسلاوا پہنچے۔

ورلڈ ریکارڈ بنانے کا عزم لیے دونوں دوستوں نے اپنی منزل تک پہنچنے کے لیے ٹرین میں وینیا تک کا سفر کیا اور وینیا پہنچ کر بڈاپسٹ پہنچے جو کہ ان کی آخری منزل تھی۔

اس پورے سفر میں ایڈم اور ان کے ساتھی کرس کو 23 گھنٹے اور 50 منٹ کا وقت لگا جس کے بعد ان دوںوں نے گنیز بک آف ورلڈ ریکارڈ میں اپنا نام درج کروالیا۔

ایڈم کا کہنا تھا کہ اس ریکارڈ کو بنانے سے قبل انہوں نے 24 گھنٹوں میں زیادہ سے زیادہ ممالک کی سیر کرنے کا ریکارڈ بھی توڑا تھا اور اس ریکارڈ کو بنانے کے لیے بھی انہیں بہت سی مشکلات کا سامنا کرنا پڑا مگر ان سب کے باوجود پورے سفر میں ان دونوں کو بے حد مزا آیا۔