فوج اور پولیس کے 10جوان TTP اور TLP کے ہاتھوں شہید ہوئے، سینیٹر مصطفی نواز کھوکھر

سینیٹر مصطفیٰ نواز کھوکھر کا کہنا ہے کہ صرف کل کے دن فوج کے 2، پولیس کے 4 جوان خیبر پختونخواہ میں ٹی ٹی پی جبکہ 4 جوان پنجاب میں ٹی ایل پی کے ہاتھوں شہید ہوئے ہیں۔

سینیٹر مصطفیٰ نواز کھوکھر نے اسلام آباد کی طرف مارچ کرنے والے کالعدم تنظیم کے کارکنوں سے متعلق اپنے بیان میں کہا ہے کہ صرف کل کے دن سیکیورٹی فورسز کے دس بہادر جوانوں نے مذہبی شدت پسندوں سے لڑتے ہوئے جانیں دی ہیں۔

کالعدم تنظیم کا مارچ، رکاوٹوں کے باعث شہری شدید پریشان

اسلام آباد کی طرف مارچ کرنے والے کالعدم تنظیم کے کارکنوں نے ’کامونکی جی ٹی روڈ‘ پر پڑاؤ ڈال رکھا ہے، مارچ کو روکنے کے لیے راولپنڈی میں سیکیورٹی مزید سخت کر دی گئی ہے، حکومت نے2 ماہ کے لیے پنجاب میں رینجرز کو بلا لیا ہے، رکاوٹوں کے باعث شہری شدید پریشان ہیں۔

سینیٹر مصطفیٰ نواز کھوکھر نے سوال اٹھاتے ہوئے کہا کہ پولیس اور فوج کے جوان کب تک اسلام آباد اور پنڈی کی غیر دانشمندانہ پالیسیوں کی قیمت ادا کرتے رہیں گے؟ 

اُن کا مزید کہنا تھا کہ آج بھی ہمارے مسائل کا حل نیشنل ایکشن پلان پر من و عن عمل کرنے پر ہے، مذہب اور شدت پسند تنظیموں کو جب بھی سیاسی مقاصد کے لیے استعمال کیا جائے گا یہی نتیجہ نکلے گا، یہ بات ہماری ریاست اور سیاسی جماعتوں کے پلے کب پڑے گی ؟ 

کالعدم تنظیم سے جھڑپ، شہید ASI کی میت گھر منتقل

کالعدم تنظیم اور پولیس کے درمیان جھڑپوں کے دوران شہید ہونے والے اے ایس آئی محمد اکبراعوان کی میت ان کے قصور میں واقع آبائی گھر پہنچا دی گئی۔

سینیٹر مصطفی نواز کھوکھر نے کہا کہ اس موقع پر اگر ہم صرف یکجا ہو کر پنجاب پولیس کہ ساتھ کھڑے ہو جائیں تو رینجرز کی بھی ضرورت نہیں،  پنجاب پولیس میں ان فسادیوں سے نمٹنے اور ان کی تسلی بخش چھترول کرنے کی مکمل اہلیت ہے۔

سینیٹر مصطفی نواز کھوکھر کا کہنا تھا کہ میں کم از کم اپنی ذات کی حد تک پنجاب پولیس کے جوانوں اور افسران کے ساتھ اس مشکل گھڑی میں کھڑا ہوں۔