• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بچوں کی وجہ سے اداکارائیں کام پر توجہ مرکوز نہیں رکھ پاتیں، فیصل قریشی

کراچی (مانیٹرنگ ڈیسک)پاکستان شوبز انڈسٹری کے معروف اداکار اور میزبان فیصل قریشی نے کم عمر ساتھی اداکاراؤں کے ساتھ کام کرنے کی اصل وجہ بتا دی ۔حال ہی میں ایک انٹرویو میں فیصل قریشی نے بتایا کہ انٹرٹینمنٹ انڈسٹری اب ایک ایسے دور میں داخل ہوگئی ہے جہاں اداکاروں کے درمیان عمر کا فرق بھی ایک مسئلہ بن گیا ہے۔فیصل قریشی کہا کہ ان کے ساتھ اداکاری کی دنیا میں قدم رکھنے والی بہت سی اداکاراؤں نے شادی کرلی ہے اوراب وہ اپنے بچوں کی پرورش میں مصروف ہیں۔اداکار نے بتایا کہ وہ حال ہی میں سنیتا مارشل کے ساتھ کام کر رہے تھے تو انہوں نے ہمیشہ سنیتاکوسیٹ پر اپنے بچوں کے بارے میں فکر مند پایا۔جبکہ جب وہ شائستہ لودھی کے ساتھ کام کررہے تھے، توانہیں بھی اپنے کام پر توجہ مرکوز کرنے میں دشواری کا سامنا تھا کیونکہ ان کے ذہن میں بھی ہمیشہ اپنے بچوں کا خیال رہتا تھا۔اداکار نے بتایا کہ انہوں نے سویراندیم کے ساتھ بھی کام کیا۔ وہ کیمرے کے سامنے ہوتے ہوئے بھی اپنے بچوں پر نظر رکھتیں اور اپنے بچوں کی آیا کو فون پر ان کے بارے میں ہدایات بھی دیتیں۔ انہوں نے مزید کہا کہ لڑکیوں کے لیے یہ ہمیشہ مشکل ہوتا ہے کیونکہ ان پر گھر کی ذمہ داریاں زیادہ ہوتی ہیں۔فیصل قریشی نے کہا کہ ہم سمجھتے ہیں کہ ہم گھر چلاتے ہیں لیکن دراصل یہ کام خواتین کرتی ہیں، وہ بیک وقت گھر اور کام کر سکتی ہیں۔انٹرویو کے اختتام میں اداکار فیصل قریشی نے پاکستان شوبز انڈسٹری کی اداکارہ اقراءعزیز کے حوالے سے کہا کہ کبیر کی پیدائش ہوئی ہے تب سے اداکارہ کام سے پیچھے ہٹ گئی ہیں کیونکہ وہ اپنے بچے کی پرورش پر کوئی سمجھوتہ نہیں کرنا چاہتیں۔