پنجاب اور بلوچستان میں موسمِ سرما کی پہلی بارش

پنجاب اور بلوچستان کے کچھ علاقوں میں موسم سرما کی پہلی بارش ہوئی ہے۔

پنجاب میں لودھراں، کبیر والا، گوجرہ، جہانیاں اور ٹوبہ ٹیک سنگھ سمیت کی علاقوں میں ہلکی بارش ہوئی ہے۔

بارش کے بعد دھند اور اسموگ میں کمی آ گئی، شمالی وزیرستان میں بھی ہلکی بارش ہوئی۔

کراچی میں کل سے ہلکی بارش کا امکان

کراچی والے تیاری کر لیں، چھتریاں نکال لیں، محکمۂ موسمیات نے کراچی میں کل اور 27 دسمبر کو ہلکی بارش کا امکان ظاہر کر دیا ہے۔

بلوچستان میں مغربی ہواؤں کا سسٹم داخل ہونے سے کوئٹہ سمیت مختلف شہروں میں بارش اور پہاڑوں پر برف باری کا سلسلہ شروع ہو گیا ہے۔

محکمۂ موسمیات کے مطابق بلوچستان میں برف باری اور بارش لانے والا یہی سسٹم آج اور کل کراچی میں بھی اثر انداز ہو سکتا ہے۔

وادیٔ کوئٹہ کے علاوہ مسلم باغ، کان مہتر زئی اور توبہ اچکزئی میں بھی بارش ہوئی، وادی زیارت اورگردونواح میں ہلکی برف باری ہوئی۔

بلوچستان کے شمالی حصوں میں بھی بادل برسے، زیارت اور قلعہ سیف اللّٰہ میں پہاڑوں نے سفیدی اوڑھ لی۔

وادیٔ زیارت میں سیاح خوب لطف اندوز ہوئے، خو ب ہلہ گلہ کیا، برف باری سے پہلے ہی زیارت میں سیاحوں کا رش لگ گیا تھا۔

قائدِ اعظم کے یومِ پیدائش اور برف باری کے لیے سیاح پہلے ہی بڑی تعداد میں زیارت پہنچے تھے، جن کے لیے سرکاری ریسٹ ہاؤس کھول دیے گئے۔

محکمۂ موسمیات کے مطابق آج کوئٹہ، قلات، زیارت، کوہلو، سبی، بارکھان، خضدار، ژوب، چمن، پشین اور نصیر آباد میں بارش اور پہاڑوں پر برف باری کا امکان ہے۔