نئے اداکار بھی 30 سے 40 کروڑ معاوضہ مانگتے ہیں، کرن جوہر کا انکشاف

29 دسمبر ، 2021

بھارتی فلم ساز کرن جوہر نے انکشاف کیا ہے کہ نئے آنے والے اداکار جنہوں نے اب تک اپنے آپ کو ثابت تک نہیں کیا وہ بھی ایک فلم کرنے کے لیے 30 سے 40 کروڑ معاوضہ مانگتے ہیں۔

ایک پروگرام میں کرن جوہر نے اپنی پریشانی کا اظہار کرتے ہوئے کہا کہ وہ نئے اداکاروں کی بڑھتی ہوئی اجرت سے تنگ آچکے ہیں۔

انہوں نے کہا کہ سنیما کے برے دنوں کے باوجود میں نے دیکھا ہے کہ نئے اداکاروں کے معاوضے میں بغیر کسی وجہ کے اضافہ ہوگیا ہے، جس سے میں تنگ ہوگیا۔

کرن کا کہنا تھا کہ تین مہینے پہلے اگر کوئی اداکار فلم کا کم معاوضہ مانگ رہا تھا وہ تین مہینے بعد اچانک بڑھ گیا لیکن یہ سمجھ نہیں آتا کہ کیوں بڑھا؟۔

ان کا کہنا تھا کہ ’وہ لوگ ڈیجیٹل پیسے پر چل رہے ہیں، ان کی انتظامیہ یا کوئی بھی ان اداکاروں کو یہ بتارہا ہے کہ وہاں اتنا پیسہ ہے اور میوزک اتنا کمارہا ہے، لیکن سوال یہ ہے کہ یہ اعداد و شمار کون بنارہا ہے؟ یہ لوگ فریب میں مبتلا ہیں۔‘

انہوں نے کہا کہ ایسے نوجوان اداکار جنہوں نے ابھی اپنے آپ کو ثابت کرنا ہے، ان کے منہ سے 25، 30 یا 35 کروڑ تک بھی سننے کو ملتا ہے۔

کرن جوہر کا کہنا تھا کہ ’جب اس طرح کے نمبر سے آپ کے سامنے آتے ہیں تو آپ ان ننھے اسٹارز کو ان کی فلموں کے چارٹس دکھاتے ہیں اور کہتے ہیں کہ بھائی آپ کی فلم نے صرف اتنا ہی کمایا ہے۔‘

دوسری جانب کرن جوہر نے فلم کے لیے کام کرنے والے ٹیکنیکل اسٹاف کو بھی زیادہ سے زیادہ اجرت دینے پر زور دیا اور کہا کہ یہی وہ لوگ ہیں جو آپ کی فلم کو بہتر سے بہتر بناتے ہیں۔

تازہ ترین