سابق ڈی جی FIA بشیر میمن کی حفاطتی ضمانت منظور

01 جنوری ، 2022

سندھ ہائی کورٹ نے سابق ڈی جی ایف آئی اے بشیر میمن کی 15 دن کے لیے حفاطتی ضمانت منظور کر لی۔

عدالت نے بشیر میمن کو 15 دن میں متعلقہ عدالت سے رجوع کرنے کا حکم بھی دے دیا۔

درخواستِ ضمانت میں بشیر میمن نے مؤقف اختیار کیا ہے کہ ایف آئی اے اُن سے وہ دستاویزات مانگ رہا ہے جو اُن کی تحویل میں نہیں ہیں۔

انہوں نے کہا کہ ملزم عمر فاروق ظہور کا نام ریڈ نوٹس سے نکلوانے کا انٹر پول کا اپنا طریقہ کار ہے، ملزم کا نام ریڈ نوٹس سے نکلوانے کا الزام قانون سے نا واقفیت کا نتیجہ ہے۔

ایف آئی اے حکام کا کہنا ہے کہ بشیر میمن پر منی لانڈرنگ، ملزم عمر فاروق ظہور کا نام ریڈنوٹس سے نکلوانے سمیت متعدد الزامات ہیں۔

ایف آئی اے حکام کا مزید کہنا ہے کہ بشیر میمن بتائیں کہ ملزم عمر فاروق ظہور سے تعلقات کی کیا نوعیت ہے، ملزم سے تعلقات کب سے ہیں اور کتنی نجی ملاقاتیں ہوئیں۔

ایف آئی اے حکام کے مطابق ملزم عمر فاروق ظہور سوئٹزر لینڈ، ناروے اور ترکی سمیت متعدد ممالک کو مطلوب ہے۔

واضح رہے کہ ایف آئی اے نے اپنے سابق ڈی جی بشیرمیمن کو پوچھ گچھ کے لیے آج لاہور میں طلب کیا تھا۔

قومی خبریں سے مزید