رانا تنویر کا چیئرمین نیب کیخلاف ریفرنس دائر کرنے کا عندیہ

11 جنوری ، 2022

چیئرمین پبلک اکاؤنٹس کمیٹی (پی اے سی) رانا تنویر حسین اور چیئرمین نیب جسٹس ریٹائرڈ جاوید اقبال

چیئرمین پبلک اکاؤنٹس کمیٹی (پی اے سی) رانا تنویر حسین نے چیئرمین نیب جسٹس ریٹائرڈ جاوید اقبال کے خلاف ریفرنس دائر کرنےکا عندیہ دے دیا۔

اسلام آباد میں ’جیو نیوز‘ سے گفتگو کرتے ہوئے چیئرمین پبلک اکاؤنٹس کمیٹی رانا تنویر حسین نے کہا کہ خط چیئرمین نیب کے علم سے جاری ہوا ہے تو ان کے خلاف ریفرنس دائر ہو سکتا ہے۔

ان کا کہنا ہے کہ چیئرمین نیب کے خلاف ریفرنس دائر کرنے کے لیےکمیٹی سے اجازت لینی ہے، خط لکھ کر کمیٹی کو مس لیڈ کرنےکی کوشش کی گئی۔

رانا تنویر نے بتایا کہ پی اے سی کو وزیرِ اعظم عمران خان کے نام پر لکھے گئے خط کی انکوائری کر رہے ہیں، وزیرِ اعظم کا دفتر اس میں ملوث ہے تو ان سے پوچھا جائے گا۔

انہوں نے کہا کہ ذمے داروں کا تعین کر کے کارروائی کی جائے گی، ہم نے سیکریٹری کابینہ کو 3 دن کے اندر تفصیلات دینے کا کہا ہے۔

چیئرمین پی اے سی نے کہا کہ تفصیل آنے کے بعد ہم وزیرِ اعظم اور چیئرمین نیب کو لکھیں گے۔

انہوں نے کہا کہ چیئرمین نیب کو کمیٹی کے سامنے آنا پڑے گا، ان کے پاس کوئی دوسرا آپشن ہی نہیں۔

رانا تنویر نے کہا کہ چیئرمین نیب پی اے سی کو لکھے گئے خط سے دستبردار ہوئے اور کہا کہ وزیرِ اعظم کا نام غلطی سے گیا، وزیرِ اعظم کا نام غلطی سے نہیں آتا۔

انہوں نے مزید کہا کہ چیئرمین نیب نے خود کہا تھا کہ 6 تاریخ رکھ لیں میں آؤں گا، چیئرمین نیب نے نیب کی برآمدگیوں کی تفصیل پر بات کرنا تھی۔

چیئرمین پی اے سی رانا تنویر نے یہ بھی بتایا کہ اسی دن وزیرِ اعظم کے نام سے خط آیا، حالانکہ وزیرِ اعظم تو خود پارلیمنٹ کو جوابدہ ہیں۔

قومی خبریں سے مزید