بڑی آنکھوں والا کیکڑا

17 جنوری ، 2022

سائنس دانوں نےایک ایسے قدیم کیکڑےکے بارے میں انکشاف کیا ہے کہ جس کی آنکھیں بہت زیادہ بڑی ہیں جن کی وجہ سے وہ بہت دور تک دیکھ سکتا ہے اور آسانی سے شکار بھی کرسکتا ہے ۔اس کیکڑے کے فوسلز چند سال قبل امریکی ریاست کولمبیا اور وایومنگ میں الگ الگ مقامات سے دریافت ہوئے تھے ،جن پر تحقیق کرکے معلوم ہوا کہ وہ تقریباًساڑھے نو کروڑ سال قدیم ہیں۔ان رکازات کی جسامت صرف ایک انچ کے لگ بھگ تھی۔

جنہیں Callichimaera perplexa (کالیچیمائرا پرپلیکسا) کا سائنسی نام دیا گیا۔ماہرین پہلے ہی دن سے ان فوسلز کے سروں پر موجود آنکھوں جیسے ابھاروں کی باقیات سے حیران تھے۔ مزید تحقیق سے معلوم ہوا کہ یہ ابھار واقعی میں ان کیکڑوں کی مرکب آنکھیں تھیں۔ ان کیکڑوں کی ہر آنکھ درجنوں اور سیکڑوں چھوٹی چھوٹی آنکھوں سے مل کر بنی تھی۔

علاوہ ازیں یہ آنکھیں کسی حفاظتی سانچے میں بند نہیں تھیں بلکہ کیکڑے کے جسم سے گویا باہر لٹکی ہوئی تھیں۔جب ان کا موازنہ قدیم اور جدید کیکڑوں کی آنکھوں سے کیا گیا تو انکشاف ہوا کہ جسامت کے لحاظ سے ان معدوم کیکڑوں کی آنکھیں 16 فی صدتھیں۔

جب کہ دوسری اقسام کے کیکڑوں میں پوری جسامت کا صرف 1 سے 3 فی صد حصہ ان کی آنکھوں پر مشتمل ہوتا ہے۔ اس کیکڑے کے دوسرے جسمانی خدوخال میں مڑے ہوئے پنجے، منہ کے حصے جو ٹانگوں سے مشابہ ہیں، کھلی ہوئی دُم اور لمبا جسم شامل ہیں۔

سائنس اینڈ ٹیکنالوجی سے مزید