نور بخاری اپنا اشتہار اب تک نشر کرنے پر برہم

پاکستان شوبز انڈسٹری کی سابقہ اداکارہ نور بخاری نے اُن کا اشتہار ٹی وی پر اب تک نشر کرنے پر شدید برہمی کا اظہار کیا ہے۔

سوشل میڈیا سائٹ انسٹاگرام پر جاری کیے گئے پیغام میں نور بخاری نے کہا کہ ’میں نے 5 سال قبل ایک بیوٹی کریم کے اشتہار میں کام کیا تھا جوکہ میری اجازت کے بغیر اب تک ٹی وی نشر کیا جارہا ہے۔‘

نور بخاری نے کہا کہ ’میں اب حجاب کرتی ہوں اور اس طرح میرا پُرانا اشتہار ٹی وی پر نشر کرنا اچھی بات نہیں ہے۔‘

اُنہوں نے کہا کہ ’عام طور پر کسی بھی اشتہار کو کنٹریکٹ ایک سال کا ہوتا ہے جس کے لحاظ سے یہ کنٹریکٹ بھی ختم ہوچکا ہے۔‘

نور بخاری نے مزید کہا کہ ’میں نے اب اپنی ساری زندگی اللّہ اور اُس کے دین کے لیے وقف کردی ہے لہٰذا براہِ کرم یہ اشتہار نشر کرنا بند کریں۔‘

وہ کرتی ہوں جو دل کہتا ہے: نور بخاری

پاکستان شوبز انڈسٹری کی سابقہ اداکارہ نور بخاری نے کہا ہے کہ وہ اب اپنی زندگی کے اُس مقام پر موجود ہیں جہاں وہ صرف اپنے دل کی سُنتی ہیں اور اُس کے مطابق ہی ایک خوشگوار زندگی گُزار رہی ہیں۔

واضح رہے کہ پاکستان فلم انڈسٹری کو خیرباد کہہ کر نور بخاری گزشتہ کئی عرصے سے اپنی زندگی اسلامی تعلیمات کے مطابق بسر کررہی ہیں۔