PDM لانگ مارچ، حکومت پر دباؤ بڑھانے کیلئے مریم نواز کو متحرک کرنے کا فیصلہ

اسلام آباد(آئی این پی)حکومت مخالف اتحاد پاکستان ڈیمو کریٹک موومنٹ (پی ڈی ایم)نے لانگ مارچ سے پہلے حکومت پر دباو ڈالنے کی حکمت عملی تیار کر لی۔

پی ڈی ایم کے لانگ مارچ سے پہلے ن لیگ نے عوام کو متحرک کرنے کیلئے مریم نواز کو ایک بار پھر متحرک کرنے کا فیصلہ کیا ہے۔ ذرائع کے مطابق پارٹی نے مریم نواز کو ایک بار پھر متحرک کرنے کا فیصلہ کیا ہے جس حوالے سے پارٹی قائد نواز شریف نے بھی مریم نواز کو عوامی رابطوں کیلئے ہدایت جاری کر دی ہے۔

فروری کے دوسرے ہفتے سے مریم نواز سیاسی سرگرمیاں دوبارہ شروع کریں گی،(ن )لیگ کی نائب صدر مریم نواز پنجاب اور خیبر پختونخوا کے دورے کریں گی جہاں جلسوں اور جلوسوں کے علاوہ مریم نواز ورکرز کنونشنز کی سربراہی بھی کریں گی۔

پارٹی قائدین کو ن لیگ کی نائب صدر کی سیاسی سرگرمیوں کو حتمی شکل دینے کی ہدایات بھی جاری کر دی گئی ہیں،دوروں کیلئے ڈویژنل اور ضلعی صدور کو خصوصی ہدایات دے دی گئیں ہیں جبکہ مریم کی گرفتاری کے خدشات پر پارٹی کو پلان بی تیار کرنے کی بھی ہدایت کی گئی ہے۔