جامعہ کراچی دھماکے کے مجرموں کو عبرت کا نشان بنائیں گے،وزیر داخلہ رانا ثناء

وفاقی وزیر داخلہ رانا ثناء اللّٰہ نے جامعہ کراچی دھماکے کے مجرموں کو عبرت کا نشان بنانے کے عزم کا اظہار کیا ہے، کہا کہ وزیراعظم شہباز شریف کی ہدایت پر آج کراچی جا رہا ہوں۔

وزیر داخلہ رانا ثناء اللّٰہ نے کہا کہ پاکستان چینی بھائیوں سے بھرپور یک جہتی کرتا ہے، یہ مشترکہ غم ہے، پاک چین دوستی پر حملہ ہوا ہے، پوری قوت سے نمٹیں گے۔

خودکش حملہ آور خاتون کی شناخت ہو گئی: ایڈیشنل آئی جی

ایڈیشنل آئی جی کراچی غلام نبی میمن کا کہنا ہے کہ خود کش دھماکا کرنے والی خاتون کی شناخت کر لی گئی ہے۔

رانا ثناء اللّٰہ کا کہنا تھا کہ متعلقہ حکام سے ملاقات کرکے حقائق معلوم کروں گا، دہشتگردی کی تحقیقات سے عظیم دوست چین کو مکمل آگاہ رکھیں گے، چینی باشندوں کی سیکیورٹی کے تمام پہلوؤں کا ازسرنو جائزہ لیں گے۔

وزیر داخلہ نے کہا کہ سیکیورٹی کے مکمل جائزے کے بعد مؤثر اقدامات کریں گے،باریک بینی سے ہر پہلو کی جانچ کریں گے۔

انہوں نے مزید کہا کہ مجرموں کو قانون کے کٹہرے میں لانے کیلئے وفاقی حکومت بھرپور تعاون کرے گی۔