فرمان الہی
نماز کے اوقات
کراچی(این این آئی)پاکستان شوبز کی سپر اسٹار ماہرہ خان اور فہد مصطفیٰ کی نئی آنے والی فلم ʼقائد اعظم زندہ باد‘ کا ٹریلر ریلیز کردیا گیا ہے۔ ایکشن سے بھرپور فلم کے ٹریلر میں فہد مصطفیٰ کو ایک پولیس افسر کے کردار میں دکھایا گیا ایسا پولیس افسر جو پہلے خود رشوت لیتا ہے اور بعد میں ایماندار ہوجاتا ہے۔ ایکشن سے بھرپور ٹریلر کو دیکھ کر یہ معلوم ہوتا ہے کہ فہد مصطفی فلم میں ہولی وڈ کے جیمز بانڈ کی طرح اسٹنٹ کرتے نظر آئیں گے اورفلم میں وی ایف ایکس مناظر بھی دیکھنے کو ملیں گے، فلم کی زیادہ تر کہانی رشوت لینے اور دینے کے گرد گھومتی ہے۔اداکارہ ماہرہ خان نے ٹریلر کے لانچ پر میڈیا سے گفتگو میں کہا کہ یہ فلم سائن کرنے کی اہم وجہ فلم کی کہانی تھی جو کہ حقیقت سے ملتی جلتی ہے اور موجودہ حالات کی عکاسی کرے گی۔تقریب میں گفتگو کرتے ہوئے فہد مصطفی کا کہنا تھا کہ پاکستان میں کچھ ٹیمز ہیں جن سے لوگ یہ امید لگاتے ہیں کہ یہ اچھی فلم بنائیں گے تو اس لیے ان پر ذمہ داری زیادہ تھی۔ ان کا کہنا تھا کہ مجھے لگتا ہے کہ یہ میرے کریئر کی سب سی اچھی اور بڑی فلم ہے اور یہی میرے والد کو بھی لگتا ہے۔نبیل قریشی کی ہدایتکاری میں بننے والی اس ایکشن سے بھرپور فلم ʼقائداعظم زندہ باد ʼمیں جاوید شیخ بھی ایک سندھی پولیس کانسٹیبل کا کردار کرتے نظر آئیں گے، فلم عید الاضحی پر پاکستان بھر کے سنیما گھروں کی زینت بنے گی۔
